Ereñotzuk Auzo Udala izango du, hala onartu baitu Gipuzkoako Diputatuen Kontseiluak, dekretu bidez. Lehen ere begi onez ikusten zuela esana zuen Diputazioak, baina erabaki definitiboa orain hartu du.
Udalez azpiko erakundeek baldintza batzuk bete behar dituzte: arrazoi geografikoa, historikoa, soziala, ekonomikoa edo administratiboa izatea; biztanle gunean 500 biztanletik gora bizitzea; entitate hori sortu delako biztanleek galerarik ez izatea, bizi-kalitatean eta zerbitzuetan; eta entitatean behar-beste baliabide izatea, dagokion lana egin ahal izateko.
Gobernu Organoak eta
konpetentziak
Ereñotzuko Auzo Udalak bi Gobernu Organo izango ditu. Batetik, auzo-alkatea, kide bakarreko organo gisa. Eta bestetik, auzo-batzarra, auzo alkateak eta lau kidek osatuko dutena. Maiatzeko hauteskundeetan erabakiko dira bi organo horiek; bitartean, junta gestora batek kudeatuko ditu Auzo Udalaren lanak.
Jasoko dituen eskumenak edo konpetentziak, lau izango dira oraingoz: Ondarea administratzea eta zaintzea; mendi eta landa garapenean mantentze lan txikiak; herriaren mantentze lan txikiak, eta Auzo Udaleko eraikinen mantentze lanak, garbiketak eta zaintzak. Hortik aurrera, konpetentzia gehiago hartzerik ere izango dute, Udalarekin adostasun batera iritsita.
Udaletik jasoko du dirua
Udaletik jasoko dituen aurrekontuak bi izango dira: bat urteko diru ekarpen arruntetik, eta bestea Udalak diru laguntza berezietarako duen ekarpenetik.