EAJ-PNVk prentsa oharrean adierazi duenez, alegazio asko aurkeztu dizkio alderdiak, Arau Subsidiarioen Testu Bateratuari. Horietatik sei hauek, nabarmenenak:
«1) Florida eta Antziola aldera ari da hazitzen Hernani, eta beraz, trafikoarentzat bi sarrera-irteera berri behar dira; bat Cuesta de la Muerte ingurutik; eta bestea Florida kale bukaeratik, tren-karrilen gainetik, RENFEko estaziora».
«2) Kiroldegi berri bat egitea Landare eta Zubipe inguruan. Errugbi eta futbol taldeek ere erabiliko lukete horrela, prestazio fisikoa hobetzeko, lesioak tratatzeko, eta abar».
«3) Kaxko historikoa berpizteko, Kultur Gunea Milagrosa inguruan egin beharko litzateke, Kaxkotik hain gertu egonda, komertzioarentzat ona litzatekeelako».
«4) Herriko patrimonio historiko-kulturala mantentzea. Irrigoenea etxea ez botatzea, eta Txantxangorri eta Santa Barbara elkarteak bere horretan uztea».
«5) Industriaguneak kentzea, zona erresidentzialetik. Floridako bidean dauden industriagune guztiei trataera bera ematea eskatzen dugu, bat ere bereizi gabe».
«6) Gobernu Talde honek errespeta ditzala lehen berak egin zituen proiektuak. Hori diogu, zehaztua dagoelako, hilerria sarrera aldera haunditu behar dela, eta ez, Testu Bateratu honek dioen bezala, hilerriaren atzealdera (Adarramendi aldera, alegia)».