Scoiner, Panificadora de Hernani eta Talleres Hernani enpresak dauden lur eremua industriarako uzteko eskatzen du Arau Subsidiarioen Testu Bateratuak. Hamaikabat alderdiaren ustez, ez da zentzuzkoa hori, Floridan aldaketa bat egin nahi denean, alegia, industria zegoen lekua zona erresidentzial bihurtu nahi bada.
2007ko Arau Subsidiarioek proposatzen zuten, zona hori guztia erresidentzial bihurtzea (hiru enpresa horiek dauden tokia barne), Papelera del Norte izan ezik. Gobernu Taldeak proposatu du, Papelera del Norte dagoen partzela kalifikazioz aldatzea, eta lehen aipatutako hiru enpresa horiek dauden zonaldea industriagune bezala uztea. Hamaikabatek dioenez, Papelera del Norte dagoen partzela zona erresidentzial bihurtzea logikoa izan daiteke. «Zonalde guztia errekalifikatu behar da, inguru hori berreskuratu nahi delako, hiritarrentzat. Papelera del Norteko partzela ere errekalifikatu behar bada, Hamaikabatek ez du oztoporik jarriko.
2007ko Arau Subsidiarioetan ez genuen hala aurreikusi, oso konplejoa izan litekeelako hor dauden enpresa eta tailer txiki guztiak lekuz aldatzea». «Ez duguna ulertzen da, Papelera del Norteko partzela errekalifikatu eta Scoiner, Panificadora de Hernani eta Talleres Hernani dauden zonaldea ez errekalifikatzeko eskatzea. Kontraesan bat da. Ezin da Florida hiritarrentzat berreskuratu, industria hor mantentzen badugu; santu bati erropak kendu, beste bati jazteko?».
Horrez gain, zubi berria egiteko proposamena ere ez du erabat ondo ikusten Hamaikabat alderdiak. «Papelera del Norte dagoen horretan zubia egin nahi da Karabel aldera, trafikoarentzat. Gure ustez, trafikoak Florida kale bukaeratik joan beharko luke, eta hor proposatu den zubi hori oinezko eta bizikletentzat utzi. Horrela, kotxeak Karabeletik pasatzea eragotziko litzateke».