Hiru puntu bozkatu eta onartu zituzten asteazkenean, Udalean egin zuten Plenoan: animaliak edukitzea eta babestea arautzen duen ordenantza; epaitegiak emandako autoa betetzeko San Markosekin egindako hitzarmena; eta Santa Barbarako tiro eremuko hitzarmena 2011n bukatzea.
Tiro eremua 2011 arte erabiliko du
Txantxangorrik
Santa Barbara auzoan Txantxangorrik tiro eremu bat du egun, Udalarekin hala hitzartuta; puntu hori izan zen hain zuzen Plenoan zeresan haundiena izan zuena. Plenoak Gobernu Taldearen eta Ezker Batuaren aldeko botuarekin eman zion baiezkoa hitzarmena bukatzeari; PNV eta Hamaikabatek kontra bozkatu zuten, eta PSE-EE eta PP abstenitu egin ziren.
Udaleko Batzorde Iraunkorrak 1964an onartu zuen Txantxangorriri Santa Barbarako lursail bat uztea aldi baterako. Lursail horretan tiro-eremu bat jartzea zen helburua. Erabakian ordea, ez zuten zehaztu zenbat denborarako utziko zion, eta ezta zein baldintzetan ere. Ordutik elkarteak tiro-eremu gisa erabili du lursaila. Gauzak horrela, 2005ean Udalak eta elkarteak hitzarmen bat sinatu zuten 2008ko abenduaren 31ra arte. Handik aurrera, epe hori beste lau urtez luzatzeko aukera zegoen kontrakorik ez bazen, eta hala egin zuten. Orain, falta den denbora betetzean, Txantxangorrik 2012ko abenduaren 31n utzi beharko du lursaila, Udalak agindutako baldintzak beteta.
Beste lursail bat
Txantxangorri elkarteko ordezkariek Plenoan azaldu zutenez, ados daude Udalak hartutako erabakiarekin, hau da, Santa Barbarako hitzarmena bukatzearekin. Hala ere, Udalari tiro eremua jartzeko beste gune bat eskatu dio elkarteak, eta bi proposamen ere egin dizkio azken 10 urteetan. Elkarteko arduradunak Plenoan adierazi zuenez: «bi proposamenak ez dituzte onartu, eta Txantxangorri elkarteak 500 bazkide dituela kontuan izanda, gure ustez ez da bidezkoa praktika honek herrian jarraipena izango duela ziurtatzeko beste gune bat ez ematea. Udal honek soluzioa bilatu nahi ez badu, hauteskundeen ostean, Udal berriarekin akordio batera iristen saiatuko gara».
Animaliei buruzko araudia
Animaliak edukitzea eta babestea arautzen duten ordenantza, Gobernu Taldearen, PSE-EE, PNV eta PPren aldeko botoekin onartu zen; Hamaikabat abstenitu egin zen. Ordenantza honekin, batetik Udalak babestu nahi du txakurrak kalean ez uztea edo abandonatzea, eta bestetik, jabeak txakur kakak espazio publikoetatik jasotzea. Horretarako, txakurraren Udal erregistroan, orain arteko datuez gain, txakurraren DNA (ADN) analisia ere jasoko dutela jakinarazi dute.
Plenoak onartuta, herritarrek hilabeteko epea izango dute zuzenketak aurkezteko; ondoren, Plenoak behin betiko onarpena eman beharko dio araudiari.
Hernanik biltzen jarraitzea onartu zuen Plenoak
Otsailaren 1ean sinatu zuten San Markok eta Hernanik Atez Ateko zabor bilketa nola egin adosten duen akordioa. Hitzarmenean Hernanin hondakinak biltzen zeinek jarraituko duen erabakitzen da, eta bertan San Markok asumitu ditu konpetentziak ontzi arinak eta papera biltzeko, juezaren sententziak hala eskatzen ziolako. Hala ere, Hernanik bilduko ditu hondakin horiek, efikazia mantentzeko. Trukean, San Markok ordaindu egingo dio Hernaniri zerbitzu horiengatik, eta diru sarrerak ere San Markorentzat izango dira. Atzo Plenoak baiezkoa eman zion akordioari Gobernu Taldea eta Ezker Batuaren aldeko botoekin; gainerako alderdiek kontra bozkatu zuten.