Arau Subsidiarioen Berrikuspenaren Testu Bateratua erakusketan dago hilaren 30era arte, eta alegazioak egiteko eta arkitektoarekin biltzeko aukera dago bitarte horretan. Erakusketa fase honetan, Udalak bi hitzaldi antolatu ditu azalpenak emateko eta azken hitzaldia asteazkenean izan zen. Lehenengo hitzaldira bezalaxe, gaiak sortzen duen interesagatik, herritar ugari gerturatu zen. Azalpenen ondoren, hainbat herritarrek beren adostasun eta desadostasunen berri eman zieten Marian Beitialarrangoitia alkateari eta Imanol Jimenez arkitektoari. Orokorrean lan txukuna egin zutela adierazi zien bat baino gehiagok, baina zenbait punturekin ez zetozen bat. Honako gaiak izan zituzten ahotan: Irrigoenea botatzea, bultzatzen den gizarte eredua kontuan hartzea, hezkuntza proiektu baten beharra, etxebizitza gehiegi egitea, Portun egingo diren bide berriak, dirua lortzeko kriterioa eta fase honetan erabilitako metodologia.
Irrigoenea etxea proiektuan txertatzeko eskatu zen
Testu Bateratuak Irrigoenea botatzea proposatzen du, Leokako bidezubia agerian uzteko asmoz. Aurreko bileran bezala, etxe hori ez botatzeko eskatu zen, eta proiektuaren barruan sartzeko.
Horrez gain, Galarretako proiektua dagoen bezala, lehenengo sektorerako ere proiektu bat bultzatzea proposatu zen. Eta bide horretatik, aztertzea Parke Teknologikoa nahi ote duen herriak eta nahi badu, zer nahi duen bertan.
Etxebizitza gehiegi?
Etxebizitzak ere izan ziren hizketagai. Proiektuak biltzen dituenak gehiegi direla eta beharrik ez dagoela nabarmendu zuten, 1.000 etxebizitza huts daudela argudiatuta. Beitialarrangoitiak argitu zuen, Udala ere saiatu dela kopurua murrizten, baina ezin izan dutela.
Portun egingo den bide berriarekin kezka ere azaldu zuten herritar batzuk. Beharrezkoa ote den galdegin zuten eta jasangarritasuna/sostenibilidad-eaz hitz egiten dela, baina ez ote den kontrako emaitza lortuko eta trafikoa bertan pilatuko. Jimenezek azaldu zuen, dagoen bideak konponbidea behar duela. Hala, bariante bat egingo litzatekeela eta ez litzatekeela trafikoa auzotik bertatik pasako. Eta gaineratu zuen, errepide normal bat izango dela ez autopista bat.
Obrak egiteko, hau da, parkeak, bideak... dirua lortzeko kriterioa ere eztabaidagarria dela aipatu zen. Konstruktoreek dutela boterea, herrian sentsazio hori dagoela nabarmendu zuen herritar batek. «Etxeak egiten dituzte eta orduan lortzen dugu parke bat», azaldu zuen. Arkitektoak azaldu zuen Udalak ez duela dirurik, ez duela beste alternatibarik. Alkateak kriterioa eztabaidagarria dela erantzun zuen, baina helburua ez dela etxeak egitea. «Beti da beste zerbait lortzeko, eskumena, zerbitzuak, bideak, parkeak... Udalak dirua balu, zuzenean egingo luke, baina ez du». Gainera, testu bategin honekin, Arau Subsidiarioak moldatu bakarrik egin ahal izan dituztela adierazi zuen Alkateak, eta alde horretatik eskuak lotuta dituztela.
Erakusketa fasearen metodologiarekin ados ez zegoela ere jakinarazi zion herritar batek Udalari eta hilabete gehiago luzatzeko eskatu zuen, jendearen interesa zein den ikusita. Bide horretatik jo zuen beste batek, «bi ordu eta erdiko aurkezpena izan da eta beste bi ordu behar ditugu hitz egiteko, baina berandu da eta nekatuta gaude».
Erakusketa fase honetan, tartean, abuztua egon dela ere aipatu zuen, eta eztabaidarako bidea berriro zabaltzea nahi lukeela. Alkateak erantzun zion, prozesua oso luzea dela, legegintzaldia bukatzear dela eta horrela izan dela. Uztailean eman zion lehen onarpena Plenoak Testu Bateratuari eta abuztutik erakusketan dago. Berez 45 eguneko epea izaten da baina iraila bukaera arte luzatu dute epea. «Horrexegatik, tartean abuztua zegoelako, erabaki genuen epea luzatzea. Dena dela, abuztuan jende asko pasa da Udaletik», gaineratu zuen. Eta argi utzi zuen oraindik badagoela alegazioak egiteko eta arkitektoarekin hitz egiteko aukera.