Gazte Txokoak ikasturteari hasiera eman eta ateak berriro zabalduko ditu gaur. Horretarako, merendola eder bat antolatu dute. Bihar eta etzi, txapa tailerra izango da, ostiralean Play Stationean aritzeko aukera izango da eta larunbatean frontenisean jokatzeko aukera.
Makina bat ekintza
Gazte Txokoa, Udalak 11-16 urte bitarteko gazteentzat eskaintzen duen txokoa da. Bertan ez aspertzeko hainbat gauza topatu ditzakete gazteek eta gainera ohiko lagunekin topatu edo lagun berriak egiteko aukera ematen du.
Gazte txokoak dituen baliabideen artean, besteak beste, futbolina, mahai jokoak, aldizkariak, mahaia, ping-pong, musika, dardoak, malabareak... aurkitzen dira. Bestalde, hainbat ekintza ezberdin bideratzen dira hilabete osoan zehar, horien artean eskulanak (ispiluak, kandelak, karterak, hiru dimentsiotako koadroak, mosaikoak...), tailerrak (sukaldaritza, masajea, beste kulturak...), irteerak (irlara, Arcachoneko akuaparkera, hondartzara, Beigorri abentura parkera...) eta kirol ekintzak (eskalada, piraguismoa, karsak, zaldian ibiltzea, futbola, boleibola...) eskaintzen dira.
Irailean, igandetan itxita
Gazte txokoa Aristizabal kaleko 5. zenbakian dago eta bere ordutegia honakoa da: asteartetik ostegunera 17:00etatik 20:000etara eta ostiraletik igandera 17:00etatik 21:00etara. Hori bai, iraileko igandeetan lokala itxita egongo da.