Hamargarrena!

«Amari eskaintzen diot ha­margarrena, txapel hau berezia delako, eta ama bakarra delako». Malkoei eutsi ezinda ospatu zuen Ezkurra haun­diak atzoko garaipena, hamar behatzak publikoari erakutsiz, eta emozioa bistan zuela. Ez zen gutxiagorako, gorriak ikusi batzituen atzo Julen San Miguel gazte eta gogor bati gaina hartzeko.

Arnasik gabeko partidua
Ia etenik gabeko finala jokatu zuten atzo Doneztebeko bi pelotariek, bi ki­ro­lari haundik bakarrik jokatu dezaketen bezalakoa. Elkarri arnasik eman gabe aritu ziren, eta 24-23 tantora arte ez zen nagusitu bietan inor. Zortzi berdinketa izan zituen, 4-4, 7-7, 8-8, 10-10, 18-18, 19-19, 21-21 eta 23-23. Sakez min egin zioten elkarri (Ezkurrak 9 tanto, eta San Miguelek 8), baina errestoan bikain aritu ziren biak ere.  

Partiduko tantoa, 24-23­koa izan zen. San Miguelek mirariz altxa zituen bi pelota (moztutako bat eta errebote bat), eta hirugarrena, errebotean hilko zela zirudiena, lurrera jauzi eginda bueltatu zuen doneztebarrak... txapara ordea! Hor hau­tsi zen partidua. Ezkurra ia zuzenean iritsi zen bukaerara. Az­ke­nean, 30-24, inoizko erremontistarik onenaren al­de. Koteto Ezkurrak hizki be­reziz idatzi du bere izena, erremotearen historian.

Izan dena, eta izan litekeena
Bi generazioren arteko talka izan zen atzo Galarretan. Ba­tek sobera erakutsi du zenbat den; besteak berriz, zenbat izan litekeen. Ezkurrak indar hartu du datozen urtetarako, eta San Mi­gue­lek binakakoan du hurrengo erronka, bi hilabete barru.

Galarretak ere arnas hartu zuen atzo, aspaldiko betekada haun­dienarekin: 1.000 lagun.