Bujari, Abdalahi, Mohamed, Fatma, Fatimetu, Tfrrah eta Mentou, aurten Hernanira etorri diren ume sahararrak dira. Uztailaren hasieran iritsi ziren bertako familiekin uda pasatzera eta bi hilabeteren ostean, datorren ostegunean itzuliko dira etxera.
Gauza mordoa egin dituzte bertan, bai taldean, begiraleekin, eta baita familiekin ere eta oso gustora dabiltzala azaldu diote Kronikari. Astelehenetik ostiralera egunero bildu dira goizetan, Nagore Arraras eta Aroa Lasa begiraleekin eta besteak beste, hondartzara, mendira, igerilekura, Igeldora, Tolosara, Reala animatzera... joan dira. Eta azken egunak aprobetxatzeko ere, ekintza mordoa antolatu dituzte: haur, familia eta begiraleekin afaria, festa saharauia Tolosan...
Bertako familiekin ere egin dituzte irteerak. Batzuk Port Aventurara, beste batzuk, Benidormera, Galiziara, Madrilera, Frantziara, Aizarnako baserrira... joan dira.
Ondo pasatzeaz gain,
osasuna zaintzea helburu
Haurrak hemen dauden bitartean, ondo pasatzeko aukera izaten dute, baina horrez gain, osasun azterketak egiten dizkiete. Begiraleen esanetan, «normalean burdina izaten dute baju xamar eta elikadurarekin lotura duten beste arazo batzuk, eta bi hilabeteko egonaldian segituan nabaritzen da aldea».
«Oporrak Bakean
egitasmoaren azken urtea izatea nahi genuke»
Haurrak, begiraleak eta familiak oso gustora daude Oporrak Bakean egitasmoarekin, gustora pasatzen baitute uda elkarrekin, baina azken urtea izatea nahi lukete. «Guk nahi duguna, Sahara libre izatea da», azaldu dute.