LASUNBEBERRI-MARIELUTS auzoko jaiak urtetik urtera indartuz doaz eta aurten, auzo eguna ospatu beharrean, bi eguneko festa antolatu dute. Egun haundia larunbatean izango da orain arte bezala, baina ostiralean ere izango dira ekintzak. Futbito eta Frontenis Txapelketak jokatuko dira arratsaldean eta ondoren, sardinada eta rock kontzertuak izango dira. Herriko hiru taldek joko dute: Met-Heav, Hilotz eta New Souls taldeek, hain zuzen.
Txapelketekin sortzen zen giroari eusteko asmoz luzatu da festa
Aurten laugarren urtea da Latsunbeberri-Marieluts auzoan festa antolatzen dela. Orain arte iraileko bigarren larunbatean izan da auzo eguna, iaz izan ezik, eta aurten, bi egunetara zabaltzea erabaki du Jai Batzordeak. «Kontua da orain arte ostiraletan Futbito eta Fron-tenis Txapelketak jokatu izan direla, larunbatean ez zegoelako denborarik dena egiteko, baina besterik ez, eta hor sortzen zen giroari jarraipen bat eman behar zitzaiola proposatu zen. Hala, sardinada eta kontzertuak antolatzea erabaki dugu. Probatu egingo dugu ea nola ateratzen den eta datorren urtean ikusiko da!», azaldu dute.
Txapelketetan izen ematea eta bazkariko sarrerak salgai asteazkenera arte
Futbito eta Frontenis Txapelketak ostiralean jokatuko dira eta Ping-pong-ekoa larunbatean. Txapelketa horietan parte hartzeko, izena asteazkena baino lehen eman behar da Karobi elkartean, 20:00etatik 20:30etara.
Horrez gain, larunbatean, auzo bazkaria izango da eta txartelak salgai daude asteazkenera arte, baita ere, Iñaxi, Latsunbe eta Gailur okindegietan. Helduen menuak 13 euro balio ditu eta haurrenak 7 euro.