Partidu ederra izan zen atzo Galarretan jokatutakoa. Ezkurra eta Urrutiaren arteko norgehiagokak xarma berezia zuen eta espero bezala, ez zien hutsik egin bertaratutako zaleei. Ezkurra ez zen faborito atera, baina garaipena berak eraman zuen Urrutiari 24-30 irabazita. Garaipen horrekin, esku eskura dauka finala. Asteartean Matxin IVren aurka jokatuko du finalerdietako azken partidua izango dena, eta nahitaezkoa du irabaztea. Urrutiak aurrera egiteko, berriz, Ezkurrak galdu egin beharko luke, baina Matxin IVari 24 tantoko alderik atera gabe. Beraz, Ezkurrak asteartean egiten duenaren gain dago dena. Eta ikusita nola jokatzen ari den txapelketa osoan, Matxin IVak garaipena oso zaila izango duela aurreikusten da. Finalera pasatzen denak irailaren 4an aurrez aurre izango du San Miguel.
Partidu azkarra
Ezkurra eta Urrutiaren arteko partidua azkarra izan zen. Ez zen pelotazo askorik izan, 153 bakarrik eta gakoa sakean egon zen. Ezkurrak 16 tanto lortu zituen sakez eta berak gidatu zuen partidua. Urrutia ez zen eroso sentitu inongo momentuan.