DONOSTIAKO Musika Hamabostaldiaren barruan, hainbat kontzertu eskaini ditu Chillida Leku museoak, urtero egin bezala, eta aurtengo kontzertu zikloa bihar amaituko da Iwona Sobotka sopranoaren eta Alexis Delgado pianojolearen emanaldiarekin. Kontzetu hori estreinaldi baten testigu izango da; Bruno Dozza konpositoreak Eduardo Chillidaren lanetan oinarrituta sortutako obra estreinatuko baitute, hain zuzen ere. Aurtengo Hamabostaldiak ukitu errusiarra du bereizgarri eta biharko kontzertuan ukitu hori emango diote Rachmaninov, Scriabin eta Shostakovichen obrek. Izan ere, konpositore horien lanak ere interpretatuko dituzte Sobotkak eta Delgadok. Kontzertua arratsaldeko 19:00etan hasiko da. Sarrerak 12 euroan daude salgai eta honako helbidean eskuratu daitezke: www.generaltickets.com.
Kontzertuak, gaur eta bihar Donostian Donostiako Kursaalean, Musika Garaikideaz gozatzeko aukera izango da gaur Ensemble Recherche taldearekin. Kontzertua arratsaldeko 20:00etan hasiko da. Bihar berriz, Musika errusiarra XXgarren mendean izeneko konferentzia izango da arratsaldeko 18:00etan Victoria Eugenia Antzokian. Eta ondoren, 20:00etan, Cuarteto Tokyoren emanaldia, Victoria Eugenian bertan. Klasizismo puruaren irudi dira eta harizko laukoterik entzutetsuenetakoa gaur egun.