Porrotx, Mari Motots eta Irrien Lagunak, igandean Hernanin, kiroldegian

Kanta eta dantza festa izango da igandean kiroldegian, Porrotx, Mari Motots eta Irrien Lagunak ikuskizunarekin. Azken diskoko kantak, kanta herrikoiak, Imanol Urbietarenak... denetik izango da ikuskizunean, «festa haundi bat» izango dela adierazi zuten antolatzaileek, atzo prentsaurrean.
Lau-Haizetara akordeoi taldea eta AEK euskaltegiaren aldeko festa da igandekoa, eta Hernaniko Udalak laguntzen du. Lau Haizetara osatzen dute, Hernani, Lezo, Irun eta Mutrikuko Udal Musika Eskoletako akordeoilariek, eta diruaren zati bat beraientzat izango da.
Ekitaldia igandean izango da, arratsaldeko 18:00etan hasita, eta 17:00etan irekiko dituzte ateak. Sarrerak salgai daude Meri goxo-dendan, eta Elkar liburu dendan.

‘Irrien Lagunak’ diskoa kalean, eta laster DVDa
Igandeko ekitaldian Irrien Lagunak ere kiroldegian izan­go dira. Musika eta dantza oi­narri izango dituenez, Xabier Zabala eta Idoia Uralde musikariak tabladuan izango dira, eta Hernaniko soinu-joleek ere sorpresaren bat emango dute. Azaroan atera zuten diskoa, hainbat gai biltzen zituena: koloreak, heriotza, inmigrazioa, bizitza, emozioak... Maialen Lu­jan­bio hernaniarraren Irri­fa­rrak kanta diskoan da, eta Jon Maiaren Agur Abuela Maria Luisa ere bai, besteak beste. Diskoari bukaera eman, eta DVD berri baten hasiera au­rreratu zuen Joxe Mari Agi­rretxek. «Ikas­turtea­rekin ba­tera hasiko dugu proiektu be­rria: DVDa eta ikuskizuna». «Irail bu­kae­ran, Pirri­txen umeak ezagutuko dituzue, Pupu eta Lore pailazo txikiak. Osasunari bu­ruz ariko gara, Naturari buruz, Zien­tzia, Kul­tura... eta pertsonaia be­rriak: Tiritatxo, Mari Ka­lan­­bre edo Martin Bertso, Mar­tinber lagunentzat».  

DVDaren zati bat Her­nanin aurkeztuko dute urriaren hasieran, Hernanin egindakoa delako, Bide Hezi­ke­tari buruzko bideo-klipa.