Juaristik 30-28 irabazi zuen atzo Utergaren aurka finalerdietako ligaxkako partidua, baina ez zen nahikoa izan eta Casino Kursaal Txapelketatik kanpo geratu da. Izan ere, orokorrean -9 tantorekin geratu da eta dagoeneko ez du aukerarik, bihar Uterga eta San Miguelen arteko partiduan edozein dela ere emaitza.
Utergak, berriz, aukerak ditu oraindik finalera heltzeko. Horretarako, bihar, 7 tantoko aldea atera beharko dio gutxienez, San Migueli, hau da, 30-23 irabazi beharko lioke. San Migueli dagokionez, 24 tanto egitea lortuko balu finalean egongo litzateke, nahiz eta partidua galdu. Berdinketaren kasuan, puntu kopuru orokorrak erabakiko luke bietako zein sailkatuko litzatekeen finalera eta San Miguelek aldeko du aurreko finalerdiko partidua 30-19 irabazi izana Juaristiri.
Utergari ihes azken momentuan
Utergak garaipena esku eskura izan zuen atzo, baina azkenean ihes egin zion. 26-28ra arte bera izan zen nagusi, baina Juaristik jarraian egindako 4 tantok txapelketan jarraitzeko egoera zaildu dio. Partidu borrokatua izan zen. Horrez gain, atzo jokatu ziren beste hiru partiduen emaitzak honakoak izan ziren: Urrutia II-Olazar 35/Zulaika-Barrenetxea IV 16; Ezkurra-Ion 40/Urriza-Etxeberria III 37; eta Etxeberria IV-Aizpurua II 30/Zubizarreta-Agirresarobe 17.