amher SOS arrazakeria elkarteak antolatuta, inmigrazioaren inguruko argazki lehiaketaren bigarren edizioa izango da irailean. Lehiaketa Foto Forum Hernani eta Berriak-en laguntzarekin antolatu du AMHER-rek.
Elkarteak azaldu duenez, lehiaketaren helburua da, argazkilaritza medio, etorkinen egoera, eta hauen inguruan herritarrek duten pertzepzioa hobetzea: «etorkinen egoera hobetzen lagunduko duen gogoeta ekarri nahi dugu gurera. Gure gizartean harreman solidario, kolaboratzaile eta ez ezberdintzaileak sortu eta landu nahi ditugu. Horregatik, lehiaketan parte hartzera gonbidatu nahi ditugu herritarrak.
Parte hartzeko oinarriak
Inmigrazioa gaia hartuta, lehiaketa hiru maila ezberdinetan banatuta izango da: 13 urte bitartekoen maila, 14 urtetik gorakoena, eta argazki herrikoiena.
Partehartzaile bakoitzak, gehienez, 3 argazki aurkeztu ahal izango ditu, eta bakoitzak bere izenburua izan beharko du. Argazkiak 20x30 zentimetrotakoak izan behar dira, jpg formatokoak, eta gutxienez 300 ppp-ko erresoluzioa dutenak. Argazkiekin batera, partehartzaileak izen-deiturak, helbidea eta telefonoa aurkeztu beharko ditu. Epea irailaren 24ra arte izango da zabalik, eta aurkezteko bi modu daude: argazkiak amher-sos_racismo@hotmail.com helbidera bidalita, edo elkartearen bulegora eramanda (Latsunbe 42 (Transpacar).
Botazioa herritarrek eta
epaimahaiak egingo du
Behin argazkiak jasota, AMHER-rek erakusketa jarriko du Biterin, irailaren 27tik urriaren 1a arte; bertan herritarrek euren botua emateko aukera izango dute. Horrez gain, AMHER eta Fotoforumek osatutako epaimahaiak ere emango du botua. Irabazleen izena urriaren 2an jakingo da, eta sari banaketa urriaren 8an egingo da, Plaza Berrin, arratsaldeko 19:00etan.
Lanak erakusketa amaitu eta 30 egunetara jaso ahal izango dira, eta jasotzen ez direnak elkartearen esku geratuko dira. Saritutako argazkiak elkartearen esku geratuko dira.