EGUNEKO esnea, Hernanikoa, erosteko aukera izango da gaurtik aurrera herrian. Esne makina inauguratuko dute gaur eguerdian, 12:00etan, Urbieta kalean, Kiroldegi aurrean. Inaugurazioan Udaleko eta Behemendiko ordezkariak izango dira. Esne makina jartzearen proiektua EHNE sindikatuak, Behemendik eta Lurgintzak eraman du aurrera, eta Udalak eman du martxan jartzeko baimena.
Basasoro baserriko esnea
Esnea Landarbaso mendiko Basasoro baserrikoa izango da, egunekoa eta freskoa. Kalitatezkoa dela ziurtatuko duen bi baremoak paseak izango ditu, hau da, koipearena eta bakterologiarena. Esneak bost eguneko iraupena izango du eta pasteurizatua egongo da; hortaz, ez da egosi beharko.
Litroa euro batean salgai
Etxera litroko eta litro erdiko botilan eramateko aukera izango da; litroa euro bateko salneurrian, eta litro erdia 50 zentimotan. Esnea eramateko botilak, litrokoak, bertan jarriko dituzte salgai, 20 zentimotan, eta etxetik eramandako botilek ere balioko dute, urarentzako erabiltzen direnak esaterako.