Larunbatean hasiko da Donostiako Aste Nagusia, eta aurten ere asko izango dira bertara joango diren hernaniarrak eta urnietarrak. Hori kontuan izanda, Garayar autobus zerbitzuak autobus bereziak jarri ditu festak iraungo duen aste guztirako.
Donostian Hernanirako autobus zerbitzua
Gaueko autobus zerbitzuak bi ordutegitan banatu dituzte. Donostiatik Hernanira, gaueko 02:30ak arte, 15 minuturo izango da autobusa. Ordu horretatik aurrera berriz, ordubetero izango da autobusa, goizeko 06:30ak bitartean.
Hernanitik Donostiara
Hernanitik Donostiara joan nahi dutenek ere maiztasun berarekin izango dute autobusa. Goizeko 02:00ak arte (Urnietatik ateratzen da), ordu laurdenero izango da autobus zerbitzua. Eta segidan, goizeko 06:00ak arte ordubetero izango da.
Amabirjin bezperan
eta egunean, bereziak
Amabirjin bezperan eta egunean bertan, asteburua dela kontuan izanda, zerbitzua zabalagoa izango da. Bai Donostiatik Hernanira, eta baita Hernanitik Donostiara ere. Orduerdiro izango dira autobusak, gau osoan zehar.
Arratsaldeko 19:00etatik aurrera festa nonahi
Larunbatean kainoikadarekin hasiko da Donostiako Aste Nagusia, eta festak hilaren 21a arte iraungo du. Egunean bertan, su-artifizialen lehiaketa hasiko da, eta aurreneko partehartzailea valentziarra izango da, Turis suetxekoa. Suak gaueko 22:45etan hasiko dira. Eta kontzertuak ere ez dira faltako, Saguesen esaterako, Los Planetas taldeak joko du 23:45etatik aurrera. Aurten baita ere, egitarau alternatiboa prestatu dute Donostiako piratek, eta larunbatean Bebe, Ze esatek eta Sorkunek kontzertua emango dute Trinitate Plazan. Kontzertuak 21:00etan hasiko dira, eta sarrerak aldez aurretik erosi daitezke 19 euroan, www.izanpirata.info web orrian, besteak beste. Egunean bertan leihatilan ere jarriko dituzte salgai, 24 euroren truke.