AITZIBER Ezkerra eta Gurutz Agirresarobe herenegun atxilotu zituztenetik inkomunikatuta daude Ertzaintzaren eskuetan eta jasan dezaketen tratuarekin oso kezkatuta, agerraldia egin zuten atzo prentsaurrean senide, abokatu eta mediku banak, hainbat herritarrekin batera. Atxilotuei tratu duina ematea, eskubideak errespetatzea eta inkomunikazioarekin bukatzea eskatu zuten. Batez ere, Ezkerraren egoeraz kezkatuta daudela azaldu zuten, espondilitis ankilosantea izeneko erreuma baitu, hau da, gaixotasun kroniko larria. Ezkerrak mediku berezia eta medikazioa behar dituela eta postura zaintzen ez badu artikulazioan blokeoa izan dezakeela jakinarazi zuten Miren Arana medikuak eta Pello Zubiriak. Zubiriak gaitz bera du eta atxilotuta eta inkomunikatuta egon zen Egunkaria auzian. Ezkerrak komisaldegian jasan ditzakeen posturak jada tortura direla nabarmendu zuten.
‘Garzon protokoloa’
aplikatzeari ezezkoa
Alde juridikoari dagokionez, Miren Arana medikuak, Galder Gonzalez Ezkerraren mutilagunak eta Aihert Larrarte abokatuak azaldu zuten Garzon protokoloa deiturikoa aplikatzeko eskatu dutela, baina Fernando Grande-Marlaska epaileak, operazioa agindu duenak, ezezkoa eman diela, ez duelako beharrezko ikusten. Aipaturiko protokoloa aplikatuko balitz, inkomunikatuta dagoen edozein atxiloturen eskubidea litzateke senideek bere berri izatea, atxiloaldia bideoz grabatzea eta konfiantzazko medikuak atxilotua ikusteko aukera izatea.
Larrarte abokatuak argitutakoaren arabera, Ertzaintzak badu bere protokoloa, eskatu gabe ere aplikatu behar duena. Senideei egunero atxilotuaren berri ematea eta atxiloaldia bideoz grabatzea litzateke protokolo horrek biltzen duena, baina errealitatean ez dela hori ziurtatzen gaineratu zuen. «Oraingoz inork ez du grabaziorik ikusi, ez Ararteko, ez abokatu ez inongo instituziok. Aukera ona dute atxilotuen eskubideak errespetatzen dituztela erakusteko». Dena dela, argi utzi zuen neurri horiek ondo daudela, baina tortura benetan gainditu nahi bada, inkomunikazioarekin bukatu behar dela.
«Ertzaintzaren jokabidea gehiegizkoa izan da»
Galder Gonzalez Ezkerraren mutilagunak kezka azaltzeaz gain eta arduradunei atxilotuen eskubideak errespetatzea eskatzeaz gain, atxiloketaren momentuan bizitakoaren berri eman zuen. Salatu zuen Ertzaintzaren jokabidea gehiegizkoa izan zela: «Atea lehergailuekin bota zuten sekulako triskantza eraginda. Inongo momentuan ez ziguten esan zein zen atxilotua zegoena eta zeintzuk ziren arrazoiak». Gaineratu zuen harritzekoa zela goizeko ordu horietan hainbeste komunikabide egotea eta kezka azaldu zuen. «Ez dakigu intentzioa zein den, baina badakigu iritzi publikoan izaten duen eragina eta ez dute errugabetasun presuntzioa errespetatu ere egin».
Mobilizazioak
inkomunikazioak iraun bitartean
Inkomunikazioak iraun bitartean mobilizazioak izango dira herrian. Azken bi egunetan bezala, eguerdiko 12:00etatik 12:15etara kontzentrazioa izango da Udaletxe aurrean, LABek deituta. Eta arratsaldeko 20:00etan, asanblada informatiboak Plazan.