Ertzaintzak Gurutz Agirresarobe eta Aitziber Ezkerra atxilotu zituen atzo goizaldean, Hernanin. Amnistiaren Aldeko Mugimenduaren arabera, goizeko 04:00ak inguruan sartu ziren bi gazteen etxeetara, ateak lehergailuekin botata. Miaketak goizeko 08:00ak ingurura arte luzatu ziren. Atxilotuen etxebizitzez gain, miaketa gehiago ere izan ziren Hernanin.
Espainiako Auzitegi Nazionaleko Fernando Grande-Marlaska epaileak agindutako operazioa da eta 2003ko otsailaren 8an izandako Joseba Pagazaurtunduaren (Andoaingo udaltzainburua) hilketarekin zerikusia izatea egozten diete bi atxilotuei. Rodolfo Ares Jaurlaritzako Herrizaingo Sailburuak prentsaurrean adierazi zuen, aztarna guztien arabera, Agirresarobek tirokatu zuela Pagazaurtundua eta Ezkerrak laguntza eman ziola. Eta gaineratu zuen, biak ETAko kide zirela eta «lozorroan» zeudela dei bat jasotzeko zain. AAMk salatu zuen atxiloketei eman zaien erabilera mediatikoa eta azaldu zuen Dibisio Antiterroristaren propaganda egiteko izan dela.
Protokoloari ezezkoa
Atzo asanblada informatiboa egin zen bi atxilotuen egoeraren berri emateko, eta bertan azaldu zutenez, atxilotuak inkomunikatuta daude Ertzaintzaren eskuetan. Atxilotuak izan zirenetik, senideek ez dute beraien berririk izan eta protokoloa aplikatzeko eskariaren aurrean, ezezkoa jaso dute. Larunbatera arte inkomunikatuta izango dituztela kalkulatzen dute.
Mobilizazioak
inkomunikazioa salatzeko
Inkomunikazio egoeran gertatu daitekeenarekin kezkatuta, herritar mordoa mobilizatu zen atzo. Eguerdian kontzentrazioa burutu zuten Udaletxe aurrean LABek deituta, eta jakinarazi zuten inkomunikazioak iraun bitartean egunero bilduko direla 12:00etatik 12:30etara. Horrez gain, atzo egin bezala, asanblada informatiboak eta mobilizazioak izango dira 20:00etan Plazan.