Hernaniarrak txapeldun Valentzian

CD Hernaniko infantil taldeak Valentzia CF Cup irabazi zuen herenegun Madrilgo Sporting Boadilla taldeari fi­nalean nagusituta. Penal­tie­tara irabazi zuten txuri-berdeek, 2na berdindu ondoren. Partidua oso ondo hasi zen hernaniarrentzat, lehenengo minutua bete gabe zegoela, Julen Isasak hernaniarren go­la sartu zuen. Bigarren zatian, berriz, partidua bukatzeko 8 minutu besterik falta ez zirenean, madrildarrek berdinketaren gola sartu zuten, eta pare bat minutu beranduago, 2-1ekoa iritsi zen. Eta partiduko azken minutuan, Mikel Liza­razuren jokaldi bikain bat tar­teko, Peru Erroizeneak gola sartu zuen, Hernani berdinketara eramanez. Ondori­oz, penaltietan erabaki zen partidua. Penalti jaurtiketetan talde bakoitzak 5etik bat huts egin zuen, eta 6garren pe­nal­tian Aitor Sarriegik dotore sartu zuen bere penaltia. Ondoren, txanda madrildarrentzat izan zen eta azken penalti hori Unai Lazkano atezainak gelditu zuen. Hernaniarrak indartsu da­biltza denboraldi honetan, Valentzia Cup irabazteaz gain, Donosti Cup-en bigarren postua lortu baitzuten.