Atletismoan, junior mailako Munduko Txapelketa ari dira jokatzen, aste honetan, Kanadan (gaur bukatuko da), eta bertan bi atleta hernaniarrek hartu dute parte Espainiako selekzioarekin; Maitane Iruretagoienak eta Servando Rivasek. Biek maila ona eman dute, nahiz eta finalera sailkatzerik ez lortu.
Iruretagoienak bi frogatan hartu du parte. Ostegunean 200m-ko frogan aritu zen eta sailkapen saioan seigarren egin zuen 24.70 denborarekin, bere markatik gertu ibilita (bere marka pertsonala 24.57koa da). Froga Jodie Williams britainiarrak irabazi zuen 23.79ko denborarekin. Herenegun, berriz, 4x100 erreleboan hartu zuen parte eta Iruretagoienaren taldea azkena izan zen 46.36 denbora eginda. AEBek irabazi zuen 43.56 denborarekin.
71,50m gainditu behar
Servando Rivasek herenegun hartu zuen parte mailu jaurtiketa frogan eta bere marketatik gertu ibili zen, baina ez zuen finalera pasatzerik lortu, 71,50m-ko marka gainditu behar baitzen. Servandoren jaurtiketarik onena 65,71m-koa izan zen. Urrutien jaurti zuena Conor McCullogh estatubatuarra izan zen; 76,50m egin zituen, hain zuzen.