Orain dela bost bat urte inguru egin zen lehenengo aldiz hain arrakastatsua bihurtu den Feria, Aranon. Sagardoa eta gazta egiten zituzten hiruzpalau baserri baziren eta horien produktuekin azoka bat egitea pentsatu zuten antolatzaileek. Horien artean izan ziren Ezkerran Bordako ansatarrak eta ordutik ez dute hutsik egin. Ana Mari Ansak Kronikari azaldu dionez, aurten, sagardo eta gaztaz gain, menbriloa ere eramango dute azokara. Eta beraien produktuez gain, beste bi bordatako gaztak ere izango dira eta lau sagardo gehiago. Pixkanaka, urtetik urtera, jendea animatu eta denetarik eramaten hasi zela kontatzen du Ana Marik, eta egun, gauza mordoa izaten dela Ferian: postreak, basurde gisatua, txistorra, paella, urdaiazpikoa... «Tortilla lehiaketa ere egiten da eta oso giro ona izaten da. Jendea zain egoten da, ez da ezer sobratzen!», azaldu du.
Eskulangile trebeak Aranon
Ferian, mota guztietako jakiak izateaz gain, aranoarrek egindako eskulanak ere izango dira. Eta ez nolanahikoak! Aranon eskulangile trebeak daudela argi geratu da eta etorkizuna badutela ere bai. Ikusi besterik ez daude Juanikeneko Maider Galparsorok egindako pitxiak.
Maiderrek 10 urte besterik ez ditu eta orain dela bi urte hasi zen azokan parte hartzen. «Lehenago ere egiten nituen pultserak-eta familiakoentzat, urtebetetzeetarako, eta jaietan feria egiten zela jakin nuenean, parte hartzea pentsatu nuen», dio. Pitxiak egiteko zaletasuna familiatik datorkio Maiderri, amak aurretik parte hartu izan du azokan sedazko zapiekin eta amona jostuna du.
Orain arte pultserak eta koilareak jarri izan ditu eskuragarri borondatearen truke, baina gaurko azokarako moda-modako eraztun, brotxe eta diademak ere egin ditu, amak zertxobait lagunduta. «Interneten aritu naiz begira eta amari lankide batek eraztunak nola egin erakutsi dio», azaldu du. Lana hartu duenik ezin ukatu eta prezioren bat jartzea pentsatu du aurten. «Oraindik ez dut erabaki, baina euro batean edo jarriko ditut», aurreratu du.
Garai bateko jokuak
Xauxarreko Jabier Legarretak berriz, lehenengo aldiz hartuko du parte azokan. Gaztetan bere aitak egindako jostailuak gogora ekarri eta egin egin ditu bertaratzen diren umeei oparitzeko. Besteak beste, egurra, burdina eta irudimena landuz, dama jokoa, tiratxinasak, kriskitiñak, txapak, tratoria, pistola, elikopteroa, tirrinka... egin ditu, «gaur egungo umeek ikusi dezaten garai batean nola jostatzen genuen», dio Jabierrek.
Giroa ziurtatua dago beraz, gaur eguerdian Aranon. Gainera, Feriaz gain, tortilla patata lehiaketa izango da.