Donostiako 45garren Heineken Jazzaldia gaur hasiko da eta urtero bezala, bost egunez, inguruko eta urrutiagoko jazz zaletuen bilgune izateko asmoz dator. Horregatik, aurtengoan ere emanaldi aukera ez da makala izango. 60tik gora artisten emanaldiez gozatzeko aukera izango da 12 gunetan.
Eta Jazzaldiari hasiera emateko, egitarauko kontzerturik erakargarrienetako bat izango da gaur; Patti Smith eta bere bandaren emanaldia, hain zuzen. Doan izango da eta Patti Smithen itzal eta ibilbidearen tamaina kontuan hartuta, 20.000-25.000 entzule bilduko direla aurreikusi dute antolatzaileek. Zurriola hondartzako Agertoki Berdean izango da 21:30etan.
Rock artista
eraginkorrenetakoa
Patti Smith abeslari eta olerkaria 1975ean egin zen ezagun, debuteko diskoa, Horses, argitaratu zuenean. Punk mugimenduari ikuspuntu feminista eta intelektuala ekarri zizkion. Horses-etik hasi eta kaleratu duen azken libururaino, Just Kids, Patti Smithek munduaren ikuskera propioa artikulatu du eta rockeko artista eraginkorrenetakoa izatera iritsi da. Smithen lanak oso ondo eutsi dio denboraren joanari eta zuzeneko kontzertuetan erakusten du sekula baino sasoikoago dagoela, banda sendo bat lagun duela.
Beste zortzi emanaldi
Patti Smithen kontzertuaz gain, beste zortzi emanaldi ere izango dira gaur; horietatik 6 doan. Esaterako, Agertoki Berdean baita ere, Japoniako Shibusa Shirazu Orchestra taldeak ikuskizunaren beste kontzeptu bat ekarriko du. Bertan, musika, dantza, performancea, marrazki bizidunak eta butoh izeneko dantza mota nahastuko dituzte. 00:30etan izango da. Frigo Gunean berriz, Elew entzuteko aukera izango da. Rockjazz estiloa deiturikoa jotzen du AEBetako artista honek. Mari Boine sami jatorriko abeslari norbegiarra ere bertan izango da.
Terje Rypdal/Miroslav Vitous/Gerald Cleaver hirukotearen musikaz gozatzeko aukera izango da Heineken Karpan. Eta beranduxeago, Supersilent, taldeaz. ´Ambient` elektronikoan oinarrituta, hiru musikariek barruan daramaten inprobisatzeko eta esperimentatzeko gaitasunari eragiten diote. Udaletxean, berriz, Broken Brothers Brass Band izango da entzungai. 2007an sortu zen banda eta partaideak jazzeko goren mailako titulatuak dira Iruñako Pablo Sarasate Kontserbatorioan. New Orleanseko estiloaren eta funkyaren artean mugitzen dira. Be Bop eta Altxerrin ere izango dira emanaldiak. DJ Javi Frías eta Willy Fernández Trío. Azken bi horiek ikusteko 10 euro ordaindu behar dira.
Aukera zabala, datozen
egunetan ere
Bihartik igandera bitarte jazz zaleek ez dute atsedenik izango eta gaur bezala, denetariko emanaldiak izango dituzte: Christian Scott, Ron Carter Golden Striker Trio, Arturo Sandoval Quintet, The Morning Benders, Dave Holland & Pepe Habichuela, Stanley Clarke Band feat. Hiromi, Wadada Leo Smith’s Golden Quartet, Portico Quartet, George Benson, The Claudia Quintet, Archie Shepp Quartet+Mina Agossi, Jessye Norman. Roots. In Tribute to the Greats!, Kris Kristofferson, Elvis Costello and The Sugarcanes eta DJak, besteak beste.
Informazio gehiagorako www.heinekenjazzaldia.com helbidean sartu.