hernaniko familietan dira dagoeneko Saharako errefuxiatu kanpamenduetatik udara pasatzera etorritako 7 umeak. Udalak martxan duen Oporrak Bakean egitasmoari esker, azken zazpi urtetan izan dira Saharako umeak Hernanin.
Bi hilabete
pasako dituzte herrian
Errefuxiatu kanpamenduetako zazpi neska mutilak bi hilabete egongo dira Hernanin, joan den astean iritsi ziren, eta iraila erdira arte egongo dira.
Aurten joan den urteko ume kopuru berdina etorri da, zazpi, nahiz eta batzuk berriak diren. Umeak etxean hartuko dituzten familiek eskatuta, lau joan den urteko berdinak dira. Beste hiruak berriz aurreneko aldiz etorri dira Hernanira, eta familia berriekin pasako dituzte oporrak.
Harrera udaletxean,
eta joko eta irteera ugari
udaran zehar
Hernaniko Udalak harrera egin zien iritsi berri ziren umeei hernaniarren izenean. Ostiral eguerdian izan zen, udaletxean, eta familiek lagunduta, gustora jaso zuten ongi etorria zazpi umeetako seik. Falta zena oporretara joana zen bertako familiarekin.
Ostiraleko harrera hasiera besterik ez da izan umeek udaran zehar bizituko dutenarekin alderatuta. Umeak Hernanin zehar hainbat ekintza egingo dituzte bi hilabeteetan zehar, horietako asko urarekin zerikusi zuzena dutenak: igerileku irekietara joango dira, errekara eta baita hondartza ere. Horrez gain, paseoak, kirolak eta irteerak ere egingo dituzte.
Kanpamenduetatik urrun egotea da
helburuetako bat
Oporrak Bakean egitasmoaren helburuak dira, besteak beste, umeei aukera ematea udara errefuxiatu kanpamenduetatik urrun pasatzeko, eta beharrezkoak dituzten osasun azterketak egin ahal izatea.