Hernaniko Hamaikabat alderdiak salatu du, Atez Atekoa ezarri eta bi hilabetera Gobernu Taldeak benetako datuak ezkutatzeko propaganda eginez jarraitzen duela. Eta gaineratu du, alderdiak joan den ekainaren 7an eskatu zituela astean gaika biltzen ziren kantitatearen datuak (beira, papera, ontzi arinak, organikoa eta errefusa) eta hilabete pasa arren, oraindik ez dituela jaso. «Dena dela, Alkateak eta Ingurumen zinegotziak ez dute zalantzarik izan prentsaurreko bat emateko eta Atez Atekoaren ´bertuteak` goraipatzeko», azpimarratu du. «Guk lortu ditugun datuen bidez, ordea, jakin dugu kalean bildutako hondakinak maiatzeko lehenengo astean 960 kilo zirela eta ekainaren hirugarren astean, 15.460 kilo».
«Errefusa %69 hazi da»
Nabarmendu behar den beste datu bat errefusaren igoera dela dio: «Atez Atekoaren lehenengo astean 11.540 kilo kontabilizatu ziren, ekainaren hirugarren astean, berriz, 19.560 kilo; %69 hazi da». Basura desbideratu egiten dela ere badio Hamaikabatek eta kopurua, asteko 40.000-50.000 kilo artean dagoela: «Atez Atekoaren aurretik, asteko zaborraren media 97.500 kilokoa zen eta orain apenas biltzen da 50.000 kilo astean».
Udalak bilketarako erabiltzen dituen bideak ere ezkutatzen direla azaldu du: «8 langile izatearen aurreikuspen barregarria bertan behera geratu da eta ekainean, 16 langile kontratatu dira. Hala ere, ohikoa da eguerdiko 12:00etan oraindik hondakina bildu gabe egotea kalean. Hamaikabatekook uste dugu 30 inguru beharko direla eta maiatzean, langile bakoitzaren kostua 5.200 eurokoa izan zen».
«Propaganda utzi dezatela»
Datu horiei erreparatuz, Alkateari eta Ingurumen zinegotziari eskaera egin die: «propaganda utzi dezatela eta hernaniarrak informatzea eskatzen dugu. Egi erdiek eta datuak ezkutatzeak bide motza dute, bi hilabete nahiko izan dira Atez Atekoaren gezurrak eta aurrera eraman ezina agerian uzteko».