Eguzki talde ekologistak gogor salatu du Diputazioa, Donostiako Bigarren Saihesbidea egiteko erabili duen politikagatik. Kronikara bidalitako prentsa oharrean, Eguzkik dio, trafikoari ez diola erremediorik emango azpiegitura horrek, eta gainera, trafikoa haunditzea besterik ez duela lortuko «modu honetako bideak egin direnetan gertatu izan den bezala. Bidasoa eta Donostialdea artean izugarrizko trafiko-mugimendua dago, eta beste bide bat egiteak mugimendu hori haunditu egingo du, ez erremediatu. Diputazioak bultzatu behar duena da, trafikoa gutxitzea». Trafikoaren arazoari erremedioa jartzea nahi bada, garraio publikoa bultzatu behar dela dio Eguzkik. «Karretera hori egiten 300 miloi euro gastatu dira; zenbat gastatu dira Lurraldebusen? Edo bidegorriak egiten? Edo oinezkoentzako bideak egiten? Erremedioa da, hor inbertitzea».
«Ingurugiroari kalte konpondu ezinak egin zaizkio»
Eguzkik salatu du, bigarren saihesbidearekin ingurugiroari kalte ikaragarriak egin zaizkiola, «konpondu ezingo direnak». Lurraldea zatituko duen pareta moduko bat dela bide hau, dio Eguzkik, Mendizorrotz eta Lau Haizeta parkeak «oraindik gehiago apartatu edo aislatuko dituena». Nekazal lurrak asko kastigatu dituela, eta motorrean oinarritutako gizarte eredu bat bultzatzen ari dela, leporatu dio talde ekologistak, Foru Aldundiari. «Orain gainera, badakigu, hirugarren saihesbide baterako proiektua egina dutela, eta Donostiatik hasi eta Aiako Harria Parkera bitarteko lurrak, erabat artifizializatuko dituztela».
«200 miloiko prestamoa gure inpuestoak hipotekatzeko»
Eguzkik salatu du, Diputazioak 200 miloi euroko prestamoa lortu duela Europako Bankutik, proiektu hori finantziatzeko, eta horrek, gipuzkoarren inpostuetako dirua hipotekatuko duela urte askotarako.
«Donostialdeako autopista berriak ekarri duena da, janari produkzioa gutxitzea, lurra suntsitzea, ingurugiroa eta gizartea pobretzea, eta lau enpresa aberastea».