Chillida-Leku museoak irailean betetzen ditu 10 urte, eta urteurrena ospatzeko, erakusketa eta ekitaldi bereziak ari dira egiten museoan. Bigarrren sehilekorako erakusketa berezia antolatu dute, Eduardo Chillidaren obra zuzen-zuzenetik erakusten duena. Hamar urte hauetan egindako erakusketetan, eskultorearen ikuspegi ezberdinak erakutsi dituzte, eta oraingoan, Luis Chillidak hala adierazita «eskultorearen obra globala, bere bizitzako obra, erakutsi nahi izan dute».
Museoa eta obra bateratzea helburu
Erakusketaren helburua da Chillidaren obra, eta Chillida-Leku museoa bateratzea. Aurkezpenean azaldu bezala, Eduardo Chillida Hernanin hasi zen artista lanetan, eta museoa bera ere, Hernanin kokatu zuen, beraz «horregatik da hain garrantzitsua erakusketaren helburua hau izatea, egiteko geneukan zerbait zen».
Erakusketa aurkezpena egin bezain pronto ireki zuten, astezkenean, eta urtea bukatu arte izango da zabalik. Bertan, ikusgai izango dira Eduardo Chillidak 1951a eta 1980a bitartean egindako obrak.
Udako ordutegia
Uztailaren 1etik aurrera, Chillida-Lekun udako ordutegi berria dute. Astelehenetik larubatera zabalik izango da goizeko 10:30etatik 20:00etara, eta igandean 10:30etatik 15:00etara.
`The Billie´ taldearen kontzertua larunbatean
Bestalde, udaran ere musikaz gozatzeko nahikoa aukera izango da Chillida-Lekun, funk, soul, eta indie estilotako hiru kontzertu izango baitira. Aurrenekoa bihar izango da, Xpressionk taldearen laguntzarekin antolatutakoa. Kontzertua The Billie jeans taldeak emango du, eta arratsaldeko 18:00etan hasiko da. Kontzertura joan nahi dutenentzat, sarrerak ordu erdi lehenago jarriko dituzte salgai, 17:30etan, hiru euroren truke. Hasiera batean, kontzertua aire librean egitekoak dira, baina jakinarazi dutenez, euria egingo balu, kontzertua baserrian egingo litzateke.