Diana eta kontzertuak, Txistu eta Musika Bandaren eskutik

Hernaniko Udal Txistulari Bandak eta Musika Bandak San Joan eguneko Diana berezia eskainiko dute gaur. Mendirik Mendiren doinuaren erritmora ibiliko dira herrian barrena goizeko 09:00etatik aurrera. Eta Dianaren ondoren, aurten ere ardo-goxoa eta pastak izango dira nahi dutenentzat. Osti­ral, larunbat eta igandean 07:00e­tan izango da  Diana, Musika Eskolakoen eskutik.

Zortzi pieza Txistulari Bandaren eskutik
Dianaz gain, gaur Txistu kontzertua izango da  12:00etan Udaletxeko Arku­pe­tan Patxi Apezetxearen zuzendaritzapean. Hernani eta inguruko txistulariez gain, metal boskoteak eta Kriskitiña dantza taldeak hartuko dute parte.
Guztira zortzi pieza joko dituzte: Maritxu, Ilunabarra, Baietz (Fandangoa), Algaraz (Arin arina), Hirugarren kalez kale, Tico tico, Txuri urdin eta San Joan Zortzikoa.

Musika Banda errepertorio klasiko eta berriagoarekin
Musika Bandaren kontzertua Udaletxeko Arkupetan izango da baita ere; 13:15etan hasiko da. Bost abesti eskainiko dituzte Zipri Otxandorenaren zu­zen­daritzapean.
Lehenengo bi piezak musika banden errepertorio klasikoak izango dira: alde batetik, Islas Canarias pasodoble ezaguna eta bestetik El bateo zarzuelaren zenbait zati joko dituzte.
Hirugarrena eta laugarrena berriz, berriagoak dira. Beatles gold piezan The Beatles talde ezagunaren abesti batzuk en­tzun ahal izango dira, talde hori sortu zela 50 urte betetzen direla gogoratu nahian. Laugarren piezak, Blame it on the Boogie, orain dela gutxi hil zen Michael Jackson musikari famatuaren doinuak jasotzen ditu. Az­ke­nik, eta urtero bezala, San Joan Martxarekin hasten den A Igarondo poutpourriarekin bu­ka­tuko dute.