Hernanin, atez ateko bilketarekin lehenengo hilabetean lortutako emaitzen berri eman zuten atzo prentsaurrean, Marian Beitialarrangoitia alkateak, Ricardo Ortega San Marko Mankomunitateko lehendakariak eta Izaskun Txintxurreta Ingurumen zinegotziak. Azaldu zuten lehenengo hilabetean %80tik gora birziklatzea lortu dela Hernanin eta etorkizunean are emaitza hobeagoak lortuko direla jakin arren, oso pozik daudela dagoeneko lortutakoarekin: «Gure aurreikuspen baikorrenak bete ditugu %80ko langa lehen hilabetetik gaindituta». SanMarko Mankomunitatea, Gipuzkoako Hondakinen Kontsorzioa, Urnietako sailkapen planta eta Despanorsako datuak eman zituzten eta horien arabera, 2010eko urtarriletik maiatzera, Hernanin %35,51 bildu da gaika eta Atez Atekoa jarri denetik, %81,04 biltzen da.
6 aldiz errefus gutxiago
Aipatutako iturrien arabera, lehenengo lau astetan 68 tona errefusa jaso da. 2009an, berriz, 442 tona. Beraz, 6 aldiz errefus gutxiago sortzen da orain. Hori horrela, datu pozgarriena errefusaren beherakada izan dela azaldu zuen Alkateak: «Hilero zabortegira joango liratekeen 374 tona errefus bidaltzeari utzi diogu». Eta gaineratu zuen, 126 euro tonako, errefusa hori ez sortzeagatk hilero 47.127 euro aurrezten direla. Milioi erdi eurotik gora urtean.
Organikoari dagokionez, berriz, Hernani 9 tona organiko birziklatzetik 161 tona konpostatzera pasa dela azaldu zuen eta kalitatea bikaina izaten ari dela: «%99ko garbitasuna dauka».
Besteak beste, beiraren eta pilen datuak oraindik ez dituzte eskuartean eta aurreratu zuten datu guztiak dituztenean publiko egingo dituztela berriz.
«%81 birziklatzen duen herrialdeak ez du errauste plantarik behar» Alkatearen hitzetan, erraza da %80 birziklatzea eta Gipuzkoako beste herriak Atez Atekoa egitera animatzen dituzte. «Bi edo hiru herri gehiagok Atez Atekoa erabakitzen badute, errauste planta defizitarioa izango da. %81 birziklatzen duen herrialdeak ez du erraustegirik behar», azpimarratu zuen.