Aurten ez da barrakarik izango San Joan jaietan, Udalak hala adierazi du Kronikara bidalitako prentsa ohar baten bidez. Oharrean, lehenik eta behin, Udalak azpimarratu du «ez dela inondik inora gure nahia izan barrakarik ez egotea».
Negoziaketa luzea
Ferianteekin aurreneko kontaktua apirilean izan zuten, tokiari buruz hitz egiteko: «iaz esan genien, arrazoi ezberdinengatik, azken urtea izango zela Urumeako tartean jartzen zela, eta Karabelera joan beharko zutela. Gainera, egokiago antolatu daiteke bertan, eta oinezkoen segurtasuna bermatzen da».
Udalak adierazi du, aurreneko erantzuna ekainaren 7an jaso zutela: «ferianteen proposamena onartezina iruditu zitzaigun, Karabelen jarriz gero, haurren bidaiak %66 igoko zituztela esan ziguten 1,80 eurora, eta helduenak %38, 2,50era Kontuan izan behar da, Udalak ez diela ferianteei barrakak jartzeko lurra kobratzen»
Udalak onartzen du Karabelen jartzeak igoera bat suposatuko lukeela, baina ez beraiek proposatutakoa: «Udalaren azken proposamena izan da haurren prezioak %25 igotzea, eta helduena %15. Astelehenean, saiatu ziren Urumea ondoan jartzen, prezioa ez igotzearen trukean, eta bi urteko konpromisoa hartzen. Baina idatzia egiterakoan, atzera egin dute. Udalak ez du bilatu barrakarik ez egotea, eta azaldutako guztiagatik, erabaki dute ferianteek ez etortzea».