URTEKO gaurik motzena eta egunik luzeena dituen San Joan Egun magikoari ongi-etorria egingo zaio gaur, urtero bezala, San Joan sua eginez. Gaueko 21:30etan piztuko da sua Plazan, eta indarra hartzearekin batera, gerturatutakoek kalejira egingo dute suaren alboan, eta aurresku herrikoirako prestatuko dira. Ondoren, herriko 27 bat emakumek San Joan Kantaita eskainiko dute.
Kalitatezko sua aurtengoa ere
Laugarren urtez jarraian, Roxario Pikabea herriko basozainak egingo du sua eta Kronikari azaldutakoaren arabera, iazkoa bezain ona ez izan arren, kalitate oneko sua izango da. «Azken bi egunetan biltzen dut egurra eta juxtu azken egun honetan arindu du eguraldia eta eguzkiak indarra hartu du. Kea bakarrik ez, garra ere izango da!», ziurtatu du Pikabeak.
Kantaitako abestia
eskuratzeko aukera
Suaren inguruko ekitaldia bukatzeko, adin ezberdinetako herriko 27 bat emakumek San Joan Kantaita eskainiko dute. Garai batean, emakumeek San Joan gau bezperan kantatzen zuten abestia da. Hernanin bederatzigarren urtea da egiten dela.
Pepi Arrozpide Kantaitako kideak jakinarazi du aurten abestia eskuratzeko aukera izango dela bi pertsona paperak banatzen ibiliko baitira. Horrez gain, eskaera argia egin dute, abesten duten bitartean jendea isilik egoteko, abestia behar bezala entzun dadin. Eta datorren urterako gonbitea luzatu diete herriko emakumeei, animatzeko eta parte hartzeko. «Oso abesti erraza da eta jantzia guk jartzen dugu», azaldu du Arrozpidek.
Udalbiltzaren alde,
elkarretaratzea eta dantza
Udalbiltzaren aurkako epaiketa uztailaren 15ean hasiko da eta auzia salatzeko eta auzipetuei babesa emateko, elkarretaratzea eta dantza egingo dira gaur, San Joan suaren inguruan, Bai Udalbiltzari Babes Taldeak deituta.