Jai Batzordeak Musika Eskola aukeratu du aurtengo San Joan jaiei hasiera eta amaiera emateko. Hernaniko Musika Eskolak aurten 25garren urteurrena ospatzen du eta horregatik omendu nahi izan dituzte. Jai Batzordeak urtero herriko talde bat omentzen du, San Joan jaiak hasi eta bukatzeko ardura izaten dute horie. Aurreneko urteetan, Errugby taldea edo Bertso Eskola bezalako taldeek jaso zuten errekonozimendu hori, eta aurten Musika Eskolari egokitu zaio jaiei hasiera eta bukaera ematearen ohorea.
San Joanetan presentzia haundia
Hernaniko Musika Eskolak presentzia garrantzitsua du San Joanetan. Hainbat ekitalditako musikarekin, kontzertuekin edo eguneroko dianekin alaitzen dituzte San Joanak.
Gainera, azken hamazazpi urteetan, jaiei hasiera ofiziala ere beraiek eman diete urtero antolatzen duten Iragarpen Kontzertuarekin. Izan ere, ekainaren 23ko suziriak jaien hasiera ofiziala markatzen badu, Preludioak pizten du 23ko kohetearen metxa. Aurten, zoritxarrez, ez zuten zorte haundirik izan, eta eguraldi txarraren ondorioz, San Joan jaietako Iragarpen Kontzertua bertan behera geratu zen.
Hala ere, Musika Eskolako kideak oso arro daude suziria botatzeko aukera izateagatik. Gainera, 25garren urteurrenarekin eta San Joanen irekierako eta itxierako omenaldi honekin, herrian Musika Eskola zenbat estimatzen eta errespetatzen den konturatzeko balio izan die.
Aurten, 25garren urteurrena
Hernaniko Musika Eskolak aurten 25 urte betetzen ditu. 1980 urtean sortu zen eta lehenengo kurtsoan, 200 ikasle hasi ziren musikako klaseetan Hernaniko Musika Eskolan. Musika Eskolako kideen esanetan, «ohitura eta eskaera bazegoen Musika Eskola bat sortzeko, eta lehenengo urteko arrakasta ikusita, bigarren urtean jendea masan etorri zen».
Horrela, pixkanaka hazten joan zen Musika Eskolaren ikasle kopurua eta urte askotan 400 ikasleren bueltan ibili ziren.
Gaur egun, 465 ikasle eta 14 instrumentu ikasteko aukera
Gaur egunean 20 irakaslek ematen dute klasea Musika Eskolan, eta Juan Mari Beltran, Joxan Goikoetxea eta Arantxa Alberdi Musika Eskolaren sorreratik daude bertan lanean. 15 instrumentu jotzen ikasi daitezke eta horretaz gain, Abesbatzan parte hartu edota Hizkuntza Musikala ikasi daiteke Hernaniko Musika Eskolan.
25 urteko ibilbide honetan, Hernaniko Musika Eskolatik, gutxi gora behera 3.000 ikasle pasa dira guztira.
Urteurrenaren diska-liburua irailerako edo urrirako
25 urteurrena ospatzeko, Musika Eskolak diska-liburua kaleratzeko asmoa du. Festa ere antolatu nahian dabiltza, baina egutegi arazoak tarteko, ez da segurua ospatu ahal izango dutenik. Ahal izanez gero, festa irailean edo urrian egitekoak dira eta diska-liburua orduantxe ateratzeko intentzioa dute.