´Herritarren inplikazioa oso inportantea da`

E. Zubiria Etxeberria

E.R.I.C.A. sozietate kooperatiba Italiar baten izena da. Italieraz Educazione, Ricerca, Informazione, Comunica­zione Ambientale hitzen la­bur­dura da bere izena, hau da, euskarara itzuliz, Ingu­rugiroari buruzko Hezkun­tza, Ikerketa, Informazio eta Komunikazioa. Bere lana da ingurugiroarekin lotutako gaietan zerbitzu bat eskain­tzea erakunde publiko edo pribatuei.
1996. urtean sortu zen Piemonte eskualdean eta gaur egun 26 langile finko ditu. Roberto Cavallo da kooperatibako presidentea. Joan den martxoan Zero Zabor asmoaren inguruan antolatu ziren jardunaldietan Herna­niko mahai-inguruan parte hartu zuen.

Lanaren parte haundia herri
eta mankomunitateei dago
zuzendua
Cavallok azaldu digunez, kooperatibaren lanaren parte handi bat herri eta mankomunitateei bideratuta egiten dute, beren hondakinen kudeaketan laguntzen eta Atez-Ateko bilketa sistema aplikatzen. Hor sartzen da ingurugiroari buruzko formazioa eta kon­tzientziazioa zabaltzea (umeei zein helduei), Atez-Atekoa jarri au­rretik komunikazio kanpaina bat egitea, sistemari buruzko informazioa herrian hedatzea, sistema herrian nola aplikatu teknikoki eta legalki aztertzea eta bukatzeko, Atez-Atekoa bera martxan jartzea.
Lan egiteko modu parte-hartzailea du kooperatibak, beren proiektuak ez baitira teknikoki eraginkorrak lehenago herritarrei azaldu eta beren iritzia entzun ez badute. Horregatik, komunikazio edo informazio kanpaina bat egiterakoan, herritarrekin, dendariekin, udalekin edo enpresa ezberdinekin bilerak egiten dituzte proiektua esplikatzeko. ´Herritarren inplikazioa oso inportantea da gure helburuak lortu nahi baditugu. Herritarrei mezua ez bazaie iristen sistemak ez du funtzionatuko` esan digu Roberto Cavallok.

Italiatik kanpora zabaldutako sozietatea
14 urte hauetan 1.500 herri, mankomunitate edo probin­tziarekin lan egin du E.R.I.C.A.-k. Italiaz gain, Frantzia, Belgika, Erresuma Batua, Katalunia, Hegoa­me­rika edo Afrika iparraldean ere burutu ditu proiektuak. Azken urte honetan, bere proiektuen bitartez, 3 milioi pertsona gehiago hasi
dira beren zaborrak Atez-Ate biltzen.