Ohiturari jarraituz, iritsi da berriz ere San Joan jaietako iragarpen kontzertua. San Joanak iristear daudenaren adierazlerik garrantzitsuenak, XVII. edizioa beteko du aurten, eta eguraldiak tregua bat ematen badu gaueko 22:30etan hasiko da, Plazan. Beti bezala, Hernaniko hainbat musika eta dantza taldek prestatu dute ikuskizuna, eta 16 pieza interpretatuko dituzte guztira.
`Zapa´ren erailketa eta Martin Zabaletaren konkista, ardatz nagusiak Iragarpen kontzertuak iraganari begirada bat emango dio, eta orain dela 30 urteko gertaerak ekarriko ditu gogora. Izan ere, 1980ean herria asaldatu zuten bi gertaera gogoraraziko dituzte, batetik Martin Zabaletak Everestera igotzea lortu zuenekoa; eta bestetik, Zapa hil zutenekoa. Joxan Goikoetxeak prestatuta, Namaste Chao Longmu (Agur Everest), orain dela 30 urte Martin Zabaletak Everesten lortu zuen balentria gogoratuko du. Ikusentzunezko ikuskizuna izango da, musika, dantza eta irudiak nahastuko dituena Zabaletaren igoera gogoratzeko. Joaquin Ortega Canario Incansables txarangako kideak konposatutako El Zapa eta Zaparen Omenez piezek, 1980ko apirilaren 19an gertatutako Felipe Sagarna Zapa hernaniarraren erailketa gogoratuko dute. Gainera, lehenengo pieza hori Incansables txarangak joko du.
Zineak ere izango du bere lekua
Moulin Rouge eta El Principe de Egipto pelikulen soinu bandaren piezak ere interpretatuko dituzte aurtengo San Joanetako iragarpen kontzertuan.
Bi popurri ere prestatu dituzte aurtengo kontzerturako. Horietako batek, The Beatles talde britainiarra omenduko du eta bere kantarik ezagunenetakoak nahastuko ditu. Bestea, euskal kanta ezberdinak nahastuaz egingo duten popurria izango da.
Bukatzeko, urtero bezala, Mendirik Mendi eta San Joan zortzikoa interpretatuko dituzte.
Eguraldiaren menpe
Iragarpen kontzertuaren arduradunak zeruari begira bizi dira azken egunetan. Kontzertua Plazan ospatzeko erabakia hartuta dago, eta eguraldiaren menpe egongo dira azken unerarte.
Iragarpen kontzertuaren hamazazpi edizioetatik behin bakarrik suspenditu behar izan dute. 200dik gora pertsonak parte hartzen dute kontzertuan, eta zorte pixka bat izanez gero, gaur ere ez dute suspenditu beharrik izango.