Uda gainean dugu eta ikasturtea bukatzear bada ere, euskera lantzen jarraitu nahi duenak izango du aukerarik Hernani-Astigarragako AEKn. Euskaltegitik jakinarazi dutenez, eskaintza zabala da uda honetarako prestatu dutena, interesa duen edonork bere beharren arabera aukera dezan.
Mintzamena lantzeko taldea izango da aukeretako bat, astean pare bat egunekoa. Bertan astero gai baten inguruan lanketa eta saio praktikoa egingo dira.
Azterketetako idazlanak lantzeko taldea ere eskaintzen du AEKk; astean behin euskaltegira joan eta idazmena landuz. Lehenengo eta bigarren mailako azterketetarako, hain zuzen.
Zerbait trinkoagoa nahi duenak berriz, autoikaskuntza eredua du eskura. Astean behin klasera joan eta etxean lanak egiteaz gain, tutorearekin astero elkartzeko aukera izango baitu ikasleak, ikasprozesuaren jarraipena eginez.
Uztaila eta irailean izango dira saioak
Aipaturiko saioak uztaila eta irailean izango dira; hil bakoitzean lau aste. Ordutegia oraindik zehazteko dago; beti ere ikaslearen araberakoa izango baita.
Informazio gehiagorako edo izena emateko hernani@aek.org nahiz astigarraga@aek.org helbideetara idatzi edo 607 592 864/607 610 687 zenbakietara deitu behar da. Goizez, 10:00etatik 12:00etara eta arratsaldez, 16:00etatik 19:00etara. Uztailaren 2ra arte eman daiteke izena, klaseak hilaren 5ean hasiko baitira.
Horrez gain, ikastaroetan parte hartzen dutenek, Hernani eta Astigarragako Udalen dirulaguntza jasotzeko aukera izango dute.