Atez ateko historikoak ezagutzera

Italiak 60 milioi biztanle inguru ditu eta horietatik 18 milioik funtzionatzen dute Atez-Ateko hondakin bilketa sistemarekin. Urte asko daramatzate zaborra ahalik eta gehien gutxitzeko probak egiten eta oso emaitza interesgarriak lortzen ari dira. Guzti horrengatik, italiarrak erreferentzia dira Europan eta munduan. Gipuzkoa­rrok, kontu honetan hasiberriak garenez, Atez-Atekoa­ren historikoak ezagutu nahi izan ditugu bidaia honen bitartez.

Gipuzkoako San Marko eta Debagoiena mankomunitateetako kideak, herri desberdinetako udal ordezkariak, ingurumen teknikariak, Atez-Atekoaren jarraipen batzordeetako kideak eta kazetariak osatu dugu talde zabal hau.
Italiako ipar-mendebaldeko bi eskualdetan ibili da Gipuzkoako ordezkaritza, Lom­bardian eta Piamonten. Helburu nagusia: beste herri batzuetan hondakinen gestioa nola egiten duten ikustea. Atez-Ateko bilketa sistema, birziklapen tasa igotzeaz gain, zabor kopurua gutxitzeko tres­na bezala planteatzen da, bitartekoa bezala, alegia.

Herri asko bisitatu dituzte
Bidaian zehar, herri asko bisitatu dituzte beraien hondakinak nola biltzen eta tratatzen dituzten ikusi eta sortutako zaborrarengatik nola ordain­tzen duten ezagutzeko. Gi­puz­koako edozein herri edo hiri baino handiagoek egiten dute Italian Atez-Atekoa.
Ondorengo orrialdeetan Italian ibilitako bost egunetan egindakoaren kronika dator. Besteak beste, Italiako gaur egungo egoera zaborren gaian, herri ezberdinen esperientzia, konpostaje planten funtzionamendua edo Ro­berto Cavallo E.R.I.C.A. kooperatibako presidenteari egindako elkarrizketa.

Alderdi politiko gehienak Italian izan dira

San Marko mankomunitatetik, Ricardo Ortega lehendakaria (Lasarteko EB-ko zinegotzia ere bada) eta Imanol Azpiroz lehendakariordea joan ziren Italiara. Udal ordezkarien artean, Gipuz­koako lau herritako alkateak; Aitor Etxeberria (Oiar­tzun), Xabier Mikel Erre­kondo (Usurbil), Marian Beitialarrangoitia (Hernani) eta Mikel Izagirre (Urnieta). Baita kolore askotako alderdietatik joandako zinego­tziak ere: Ezker Abertzalea, Aralar, EB, Alternatiba, EAJ eta PSE.
Udaletako ingurumen teknikari batzuk eta Usurbil, Hernani eta Oiartzungo Atez-Atekoaren jarraipen ba­tzordeetako kideak ere han izan dira. Hernaniko jarraipen batzordeko ordezkari bezala, Ibon Zapian. Bu­ka­tzeko, taldea osatuz, zortzi komunikabide ezberdinetako kazetariak egon dira Italian bidaian zehar ikusitakoa Euskal Herrian kontatzeko asmoz; Gara, Berria, Euskadi Irratia, Goie­na TB, Oiartzun Irratia, Usur­bilgo Noaua!, Lasart­eko Txintxarri eta Her­na­niko Kronika.