Imanol Kamio ereñotzuarrak egin du ACT arraun ligako lehenengo himnoa

ACT arraun ligako himnoa Imanol Kamio musikari ereñotzuarrak egin du. ACTk ez zuen oraindik himnorik, eta ideia bu­ruan zerabilkiten aspaldi. Kamiori iritsi zitzaion enkargua, aurtengo urte hasieran, eta «gusto haundiz» egin du Ubarretoko semeak. Kon­po­si­zioa berak egin du, letraren ardura Iñaki Mikeo beruetearrak izan du, eta lan teknikoa Xabier del Valle eta Pello Go­rrotxategi hernaniarrek egin dute. Horrez gain, grabazio la­ne­tan laguntza haundia eman die Jorge Pacheco hernaniarrak, per­­ku­sioa­rekin, eta hiru abesbatzek kantuan: Kamiok be­rak zu­zen­tzen duen Ere­ñotzuko Ozenkik, Hernaniko Kantu­zek, eta Goizuetako Umo­re Onak. Guztira 120 la­gun inguruk egin dute ahots grabazioa, eta zuzenean ere kantatu dute, ostiralean, Do­nostiako Kursaal Are­toan, 2010eko ACT arraun ligako aurkezpen ofizialean.

Itsasoa eta arraunlariak gogoan hartuta egina
Arraunlari guztiek himnoa beraiena sentitzea nahi luke Kamiok, kantuaren egileak. «Beraiek buruan nituela egin nuen himnoa. Kirol hau zein sufritua den pentsatuta». «Lehenengo arraun hotsak omenaldi bat dira, arraunlari guztiei. Sarreran transmititu nahi nuen tentsioa, estropada hasi aurrekoa. Gero korua hasten da, estropadarekin batera. Modulazioa ziaboga da, publikorik gabe, eta bakarrik, une gordinak dira, gogorrak; hori gogoratu nahi nuen. Hor berriz korua sartzen da, eta helmugara bidea deskribatzen da, erritmo batean, esfortzu batean, arraun hots batean... eta bukatzeko, ospea, bandera... eta txapeldunaren gloria».

4 minutu, bost momentu, eta bi zati nagusi
Lau minutu eta hamabost se­gunduko kantua da, eta bost parte ditu himnoak, bi zati nagusitan banatuta. Sarrera bat, eta bi zati berdintsu ditu, tartean modulazio batekin; gero ostera, lehengo tonura etortzen da, indartsu bukatzeko. Bi zati nagusi horietan ahotsak du protagonismo erabatekoa, eta sarrera eta modulazioa erabat musikalak dira. Itsasoaren hotsa eta arraun hotsak ere sartuak daude, eta erritmoak berebiziko garran­tzia du. 20 instrumentu entzuten dira: 4 biolin, biola, kon­traba­jua, oboea, arpa, saxo-ba­joa... txelo, tronboi, tinbala, pla­ter... eta perkusioa. 3 koruk, 120 lagun inguruk kantatu dute, 2 ahotsetan. Ahotsa eta perkusioa zuzenean grabatu dira, eta beste instrumentuak teknikoki sartu.

Testuari garrantzi berezia
Himnoa egitean, testuari ga­rran­tzi berezia eman zaio. Kantauri itsasoko liga izaki, hiru hizkuntzetan egin dute: euskeraz, gaztelaniaz, eta ga­lle­goz. «Boga, boga, boga... bandera zain dago, la gloria del campeón!», dio testu zati batek. Gainerakoa interneten: www.ligasanmiguel.com.