Peru Alfaro triatleta hernaniarra bere prestakuntza puntuan jartzeko lanetan dabil azkenaldian. Bihar Zarautzeko Triatloiean parte hartuko du, bere denboraldiko helburua den Gasteizko Distantzia luzeko Europako Txapelketa prestatzeko. Ez da Zarautzko lasterketan parte hartuko duen hernaniar bakarra, Aitzol Arregi ere bertan izango da. Zarautzeko froga test moduan hartzen du Alfarok. Gasteizko Europako txapelketaren atarian, konpetizioan nola erantzuten duen ikustea da bere asmoa. 2,5 km igerian, 82 km bizikletan eta 20 km korrika egin beharko dituzte triatletek Zarautzen, eta munduko triatleta onenetakoak egongo dira irteeran. Peru eta Aitzolekin batera, arratsaldeko 14:00etan Getariako irteeran izango diren triatleten artean aurki ditzakegu, besteak beste, Eneko Llanos, Clemente Alonso, Mathias Hecht eta Scott Neyedli triatloiko izarrak.
Ekainaren 26ean, Europako Txapelketa, Gasteizen
Peru Alfaroren helburu nagusia, aurten, distantzia luzeko Europako Txapelketa da. Gasteizen jokatuko da txapelketa hau, eta Ironman famatuekin batera, Triatloiko modalitate gogorrena da.
Gasteizen, 4 km igerian, 120 km bizikletan eta 30 km korrika egin beharko ditu Alfarok, gutxi gora behera, 6 orduko lana.
Aurten ez du bere burua beste urte batzuetan bezala ikusten. 20 km-tik gorako korrika saioetan nabaritzen du txispa falta zaiola; beste guztiek lasterketako azken momentuan ateratzen duten txispa hori, alegia
Hala ere, Gasteizera ondo prestatuta joango dela uste du Peruk eta dena oso ondo atera ezkero lehenengo zortzien artean sailkatzeko esperantza du.
Unibertsitateko Munduko Txapelketan, 33garren
Orain dela bi aste, Valentzian izan zen Peru Alfaro Unibertsitateko Triatloiko Munduko Txapelketan. Merituzko 33garren postua lortu zuen distantzia olinpikoko txapelketa horretan (1,5 km igeri, 40 km bizikletan eta 10 km korrika). Aurtengo prestaketa distantzia luzerako frogetara enfokatuta edukita, emaitza nahiko ona izan zen triatleta hernaniarrarentzat.