Asteazkenean, ekainak 9, iritsi zen etxera Italia iparraldean, Piamonten eta Lombardian, ibilitako Gipuzkoako ordezkaritza. Atez Ateko sistema ezberdinak, hondakin organikoa tratatzeko plantak eta zaborra gutxitzen ikasteko moduak ezagutzeko aukera izan zuten. Cinemanbiente zine festibaleko sari banaketa ikusteko aukera ere izan zuten. Marian Beitialarrangoitia Hernaniko alkateak eta Ibon Zapiain Hernaniko Atez Atekoaren Jarraipen Batzordeko kideak bidaia oso aberasgarri eta positibotzat jo dute, beraien hitzetan «erakutsi digulako norabide onean goazela bai Atez Ateko bilketa sistemarekin eta baita lortzen ari garen emaitzekin ere». Alkatearen arabera, sortzen den zaborra gutxitzea eta Gipuzkoan pixkanaka zero zabor lurraldeak sortzen joatea da helburua. «Bidaiak argi utzi du bidea oso luzea dela eta atez ateko bilketa sistema helburu horretara iristeko tresna bat besterik ez dela». Bestetik, aipatu du inbidia puntu batekin begiratu duela Italia, bertako erakunde publikoek hondakinen gaikako bilketa bultzatu, diruz finantzatu eta betebeharreko helburu minimoak markatzen dituztelako legeen bitartez.
Eman beharreko pausoak erakutsi
Ibon Zapiainen esanetan, «Italiak erakutsi dizkigu guk eman beharreko hurrengo pausoak zein diren, adibidez, bakoitzak sortzen duen zaborraren araberako tasa ordaintzea, tasa justuagoa delako». Eta gaineratu du alderdi politiko ezberdinak joateak balio handiagoa eman diola bidaiari.
Ekainaren 19an, datorren larunbatean, gehigarri berezia eskainiko dio Hernaniko Kronikak Italiara egindako bidaiari.