Altzueta bigarren, Gipuzkoan

Adunako Zabala irabazle, eta Hernaniko Altzueta bigarren; 2004an bezala. Final lehiatua izan zen larunbatean, Gipuzkoako Sagardo Txa­pel­ketan. Bi punturen aldea, hi­ru onenen artean: Zabalak 67, Altzuetak 66, eta Astiga­rra­gako Astarbek 65. Hamar epai­leek nahikoa lan izan zu­ten sagardo onena aukera­tzen, nahiz eta tar­tean 6 enologo izan, eta 2 soumelier.

«Bigarrena ere ez da txarra!» dio Ibon Alkortak, eta ez da gutxiagorako: 27 sagardotegi lehiatu dira txapelketan; finalera sei pasa, eta bigarren geratu. Altzuetan gustora dau­de, «eskerrak gure bezero guztiei. Animoak emanez batek baino gehiagok deitu du, finalean ginela jakin duenean. Be­raien­gatik asko pozten gara».

A4-a, kupel preziatua
Altzuetako A4 kupelak eman du hain emaitza bikaina. Sa­gar­­dotegiak hiru kupel apartatzen ditu. Antolatzaileek sor­teoz aukeratzen dute, hiru horietako bat, eta handik 12 botila betetzen dira, ziritik. Horiek dira lehiatzen direnak.
A4a da, beraz, ku­pel preziatua Altzuetan. Bezeroek tankera eman omen diote gainera. «Aur­ten katak egin ditugu bezeroekin, jolas moduan,  eta puntuatu egin dituzte ku­pelak; eta askok puntuatu dute kupel hau» adierazi dio Kronikari Ibon Alkortak. Oraindik enboteilatzeko dago kupel hori, baina laster egongo da eskuratzeko moduan.

Ikertzen segi
Al­tzuetak oraingo bideari jarraitzeko asmoa du. «Xabier Kamio enolo­goa­rekin ere oso pozik eta harro gau­de. Lan polita egiten ari gara; ikertzen ari gara asko, eta emaitzak ikusten ari gara».
Orain dela sei urte bezala, Zabalak hartu dio aurrea Al­tzuetari, eta bera izango da txa­pel­duna... Norbaitek noiz­bait ken­tzen dion arte!