Azkenaldian erremodelazio lanak zirela eta itxita egon bada ere, ekaina amaitu baina lehen berriz ere irekiko ditu bere ateak Hernaniko Galarreta frontoiak. Oriamendi enpresakoek asteburu honetan hasiko den Banakako Txapelketaren fase erabakigarriena eman diote Hernaniko frontoiari, eta bertan, txapelketaren bigarren fasea eta finala jokatuko dira.
Banakako Txapelketak
formatu berria
Berrikuntza nagusi bezala, aurtengo txapelketan, Oriamendi enpresaren koadroa osatzen duten 31 erremontista profesionalek hartuko dute parte. Lehenengo fasean 25 erremontista arituko dira kanporaketa sistemarekin eta bost onenak bigarren faserako sailkatuko dira.
Bigarren fasean, izarrak
Bigarren fase honetan, koadroko pelotari onenetakoak sartuko dira txapelketan. Zeberio II, Ezkurra, Lizaso, Urriza eta Juaristik lehenengo fasetik eusten dioten bost erremontisten kontra jokatu beharko dute partidu bakarrera. Bigarren fase honetako partidu guztiak Galarretan jokatuko dira eta irabazleak finalerdietako ligaxkarako sailkatuko dira.
Urrutia, iazko txapelduna, finalerdietan.
Kanporaketa hauetatik bost erremontista pasako dira ligaxkara eta 3 pelotariz osatutako bi multzo osatuko dituzte. Ligaxka honetarako seigarren pilotaria Urrutia izango da, iaz txapelduna izateagatik finalerdietarako zuzenean sailkatu dena.
Bi multzoetako lehenengo sailkatuek jokatuko dute 2010eko erremonteko banakako txapelketako finala. Dena ondo badoa, Hernaniko Galarreta frontoian jokatuko da finala Irailaren 4ean.