Miguel Burugain hernaniarrak bosgarren egin zuen joan den igandean Gipuzkoako Txapelketan. Urte guztiko sailkapena kontuan hartuta, Gipuzkoako 26 bolari onenak biltzen ditu urtero txapelketa honek, eta tartean, hiru hernaniar, aurten: Miguel Burugain, Ibon Miner eta Migel Arrozpide. Irabazlea Xeferino Agirre segurarra izan zen, urtez urte bere maila ona erakusten ari den goierritarra. Burugain izan zen lehendabiziko hernaniarra, 5garren postuan; Miner 10garren izan zen, eta Arrozpide 11garren. Hirurak, Euskadiko Txapelketan izango dira, datorren larunbatean, Laudion.
Laudion, modalitate berezia
Modalitate ezberdinetan jokatzen dute Euskal Herriko txoko ezberdinetan, eta horregatik, txapelketa non jokatu, urtero inguru hartako bolariak izaten dituzte irabazteko aukera gehiena. Aurten Laudioko bolatokian dute. Burugainek eman dio azalpena Kronikari: «Bederatzi brila izaten dira eta haien aurrean brila txiki bat (amona). Amona joz gero, 9 puntu, eta brila bakoitzeko, puntu 1. Bolatokia aldapan; bola erdiak eskubitik bota behar dira, eta erdiak ezkerretik; eta kontrakurpilean botatzea komeni. Bolak gainera, beste aldeko pareta jo egin behar du». Esatea da errazena; ea nola moldatzen diren gure bolariak!
Eta denboraldia bukatzeko, igandean, azken txapelketa izango dute, gizonen, emakumeen, gazteen eta haurren txapelketa, Zerainen.