Erosketak egin eta globo eta piruletekin aterako dira bihar Berriak elkarteko dendetako bezeroak. Eta ez bihar bakarrik, larunbatera bitarte izango da hori; izan ere, Bezeroaren I. Astea antolatu dute Berriakeko merkatari txikiek eta besteak beste, 10.000 globo eta piruleta banatuko dituzte. Helburua honakoa: bezeroei eskerrak ematea beraien leialtasunagatik. Berriak elkarteko zuzendaritzako kideek argi utzi dute hau ez dela komertzioaren astea: «beste kanpaina batzuk egiten ditugu gehiago saltzeko helburarekin, baina oraingoa ez da guri begira, bezeroari zuzendua baizik. Beraien leialtasuna eskertu nahi dugu, besterik ez, beraiei esker baikaude hemen», azpimarratu dute.
Hernaniko merkatari
guztientzako hitzaldia
Bezeroaren Asterako antolatu dituzten ekintzen artean, hitzaldi-solasaldi bat izango da asteazkenean. Biterin izango da 14:30etatik 16:00etara. Innobazioa, espezializazioa eta komertzioaren optimizazioa izango du hizketagai Dionisio Horrillo Frutas Dionikoak. Hitzaldia ez da bakarrik Berriak elkarteko merkatarientzat izango; Hernaniko dendari guztiei dago zuzendua eta Berriak elkartetik dei egiten diete azaltzeko. Azpimarratu dutenez, horrelako hitzaldiak oso baliagarriak izaten dira: «Hizlariak oso komunikatzaile onak dira eta beren negozioan arrakasta izan dutenak. Esperientziaren berri ematen dute eta oso optimistak izaten dira, garaiotan beharrezkoa dena».
Bukatzeko,
Haragiaren Festa
Bezeroari zuzendutako asteari bukaera emateko, urtero antolatu ohi duten Haragiaren Festa izango da. Aurten ere, Plazara hurbiltzen direnek kostila eta saltxitxa jateko aukera izango dute giro ezin hobean. Eta hori guztia Acoustic Glorius musika taldearen laguntzarekin. Talde horrek perkusiozko eta haizezko instrumentuak nahasten ditu, besteren artean. Antolatzaileen arabera, orainartekoaren oso bestelako emanaldia izango da.
Udalaren egitasmoa:
‘Bost arrazoi
herrian erosteko’
Udalak Berriak elkarteko merkatariek bultzatutako jarduerari babesa emateaz gain, «herria bizirik mantentzen saiatzen direlako», herriko merkataritza txikia bultzatzeko martxan jarriko duen egitasmoa azaldu zuen Marian Beitialarrangoitia alkateak aurkezpen egunean. Bost arrazoi herrian erosteko lema duten kartelak jarriko dituzte herriko denda guztietan: «bizia, tratua, erosotasuna, preziorik ez duten aholkuak eta harreman pertsonalizatua dira nabarmendu ditugun bost arrazoiak, baina askoz gehiago ere badira».
Horri lotuta, azpimarratu zuen, herriak eta kaleek dendarik gabe bizia galduko luketeela eta herritarrei deia luzatu zien kontsumitzen dutena, bertan kontsumitzeko: «ez dira garai onak eta Udalak ezin du kontsumorako aldarria egin, baina bai kontsumitu behar den hori era arduratsuan egin dadila. Eta hori bada, bezeroaren egoera bera bizi duen herriko dendariari erostea».