Ekainaren 5ean, hau da, datorren larunbatean, Herrera de la Manchako espetxera martxa antolatu du Amnistiaren Aldeko Mugimenduak. Martxa Oarso-Txingudi eta Hernanialdeko eskualdeek antolatu dute. Hernaniko AAMk atzo prentsaurrean gogorarazi zuen euskal preso politikoak urte osoko borrokaldi batean sartuak daudela eta espetxe barruan bezala, hemen, Euskal Herrian bat egiten dutela beraien aldarrikapenarekin. «Horregatik, herritik gure babesa eta elkartasuna beraiengana iristea nahi dugu eta martxa hau antolatu dugu Herrera de la Manchara, beste herri batzuetan lehenago antolatu diren bezala, Jaen, Curtis eta Fleuryra», azaldu zuten. Borrokaldiko arrazoi nagusiak ere gogorarazi zituzten: gaixo larriak eta kondena osoa betea duten presoak etxera, mediku asistentzia duina, bakartzearekin eta dispertsioarekin bukatzea eta estatus politikoa errekonozitzea.
«Nahiko arrazoi badaude»
AAMk azpimarratu zuen estatu espainiar eta frantsesak azken urte hauetan areagotu egin dutela euskal preso politikoen aurkako errepresioa, eta muturreko egoerak bata bestearen atzetik errepikatzen direla: «horren eredu dira, Jaenen edo Tarasconen burututako gose grebak, beste hainbat espetxetan egindako protesta eta borrokak, katxeo umilagarriak direla-eta galtzen diren aurrez aurreko bisitak...». Hori horrela, nahikoa arrazoi badaudela ikusita, antolatu du larunbateko martxa AAMk eta deia luzatu die herritarrei parte hartzeko. Hernaniri dagokionez, autobusa Atsegindegitik aterako da 01:30etan, eta izena emateko zerrenda Garin tabernan dago.
Eskualdean 58 preso eta 8 197/06 doktrinarekin
Hernanialdeko eskualdean 58 preso daude: Hernanin bertan 28, Lasarten 12, Andoain, Astigarraga eta Usurbilen seina eta Urnieta eta Orion bina. Horietatik 8ri, 5 Lasarteko eta 3 Hernanikori, 197/06 doktrina aplikatu diotela salatu zuen AAMk, eta ondorioz, kalean egon beharrean bahituak jarraitzen dutela. Doktrina aplikatu dieten zortzi preso horietatik 4 Herreran daude eta horien artean dago Pakito Lujanbio hernaniarra.