hernaniko bigarren hezkuntzako ikastetxeen bateratze prozesua dela eta, Langile Ikastolako komunitateak azaldu du beraien ustez, herrian bigarren hezkuntzako bi proiektu ezberdin izatea posible dela bai azpiegitura eta ekonomia aldetik, baita pedagogia ikuspegitik ere. «Eskola Publikoaren barruan, beti defendatu dugu aniztasuna eta proiektu ezberdinak izateak eskola publikoa aberastu egiten duela eta gurasoei proiektu ezberdinen artean aukeratzeko bidea ematen diela ere bai», gaineratu dute. Hori horrela, beraien esanetan zentzuzkoa eta beharrezkoa da, irakasteko, antolatzeko eta parte hartzeko bi moduak errespetatzea eta gurasoek horien artean hautatzeko aukera bermatzea. «Beraz, ez dago zertan behartu beharrik elkartze horretan parte hartu nahi ez duen inor», azpimarratu dute.
«Kohesioa denen borondatean oinarritu behar da, ez inposizioan»
Langilekoek salatu dute Hezkuntza Sailak aurrera eraman nahi duela Hernaniko hiru DBHko ikastetxeak bateratzea, herriko kohesioa aitzakiatzat erabilita, «erreparatu gabe kohesioa denen borondatean oinarritu behar dela eta ez inposizioan» diote.
«Gainera, Langile Ikastolak beste ikastetxeekin elkartzeari ez dio inoiz behin-betiko ezezkorik eman, gure proiektuaren oinarrizko ezaugarriak bermatzeko aukerarik balego», azaldu dute. Eta bide horretan, proposatzen dute herriko gainerako ikastetxe publikoekin debate ireki bat egitea, arrazoiak eta iritziak eztabaidatzeko.
«Langileko proiektuak badu bere tokia Eskola Mapa berrian»
Langile Ikastolak azpimarratu du, orain arte garatu duen 2 urtetik 16ra bitarteko ikastetxearen aukerak, gaur eguneko Eskola Mapa berrian bere tokia duela, eta hala baloratu dutela Legebiltzarreko talde politikoen gehiengoak (PSE-EEk izan ezik). «Ikusi dute proiektu singular eta berezia dela eta merezi duela horrela jarraitzea. Gure aldeko legez besteko proposamen bat onartu dute Legebiltzarrean hori babesteko. Herriko Udalbatzak ere gehiengoz berdina onartu du eta Arartekoak gobernuari fusioaren atzerapena eskatu dio», gogorarazi dute.