datorren larunbatean, Elkartasun Eguna izango da Hernanin, baina ekimenak ez dira larunbatean bakarrik izango. Bihar, esaterako, euskal preso politikoak eta prozesu politikoa gaitzat hartuta, hitzaldia izango da Biterin, 19:30etan. Hala, Elkartasun Asteari emango zaio hasiera Sasi guztien gainetik elkartasuna lemapean. Ostegunean, berriz, pelota partiduak izango dira Tilosetan. Esnal, Oiaga, Alvarez eta Huizi herriko pelotariek hartuko dute parte. 19:00etan hasiko da. Ondoren, kantu afaria antolatu dute. Eta ostiralean, azken ostirala izanda, kontzentrazioa egingo da Plazan, 20:00etan.
500 piezako puzzlea
Larunbatean, Elkartasun Egunean, elkartasuna adierazteko hainbat modu izango dira. Goizeko 11:00etatik aurrera, irratsaio berezia egingo dute Molotoff irratian (FM 91.8) eta elkartasun mezuak bidaltzeko aukera izango da 943 556 346 telefonoan. 11:00etan, baita ere, elkartasun krosa hasiko da. Izena ordu erdi lehenago eman behar da Plazan bertan. Eguerdiko 13:00etan, manifestazioa egingo da, eta bukatzean, ekitaldia Tilosetan. Ondoren, 14:30etan, herri bazkaria antolatu dute Atsegindegin (txartelak Garinen) eta bazkalostean, preso eta herritarrek egindako lanekin enkantea izango da. Eta horrez gain, jokuak eta triki-kalejira. Eguna borobiltzeko, 21:00etan kontzertuak hasiko dira Tilosetan. Never Surrender, Itziarren semeak, Okerman eta Orreaga 778 zuzenean ikusteko azken aukera izango da. Ekitaldi berezirik ere izango da: egun osoan zehar 500 piezako puzzlea osatuko dute parte hartzaileen artean. Pieza ez ahazteko abisua eman dute.