Atez Ateko bilketa hasi eta lehendabiziko astea pasa denean, balorazio positiboa egin du Izaskun Txintxurretak, Udal Ingurumen Saileko Zinegotziak. «Pozik gaude, egun batetik bestera birziklatze kopuruak izan duen gorakadagatik. Eskerrak herritarrei, hondakinak ondo bereizten ari direlako, eta lehen egunetik emaitza bikainak lortzeko ahalegina egin dutelako, kopuru eta kalitatean».
Hernaniko Kronikara bidalitako prentsa oharrean, Txintxurretak pazientzia izateko eskatu du, «denok ikasten ari garelako, funtzionamendua ezagutzen, Udala, herritarrak eta biltzaileak». Eta argibideak eman nahi izan ditu puntu batzuei buruz.
Bilketan arazoak
Arazoak izan direla bilketan, dio Txintxurretak, eta normalak direla arazo horiek, bilketa sistema berri bat martxan jarri delako. Izan diren inzidentziei azkar erantzun zaiela ere esan du Ingurumen Zinegotziak. «Gatazka puntu nagusiak lokalizatuta daude eta bitartekoak jarri ditugu arazo horiek konpontzeko. Biltzaileak ohitu ahala konponduko dira arazo horiek».
«Dena dela, barkamena eskatu nahi diegu eragozpenen bat izan duten herritarrei». «Udala ahalegin haundia egiten ari da sistema eraginkortzeko. Eta herritarrei euren laguntza eskatu nahi diegu sistema hobetzeko».
Atez Ateko bulegora deitzeko eskatu diete herritarrei, edozein inzidentziaren berri emateko: astelehenetik larunbatera, goizeko 09:00etatik 11:00etara: 900 840 090.
Kodearekin arazoak izanez gero, bulegora deitu
Kodeak etxeetara iritsi dira, eta zintzilikatzekoetan jarriak daude. Etxera iritsi den kodeak ez badu koinziditzen zintzilikatzekoan dagoenarekin, Atez Ateko bulegora deitu. Bestalde, rafiazko poltsei ere kodea jarri egin behar zaie.
Errefusa, altzariak eta pilak
Dendari eta merkatariek ostiral goizetan atera behar dute errefusa, 10:00ak baino lehen.
Altzariak asteazkenetan bilduko ditu Udalak. Etxe atarira 08:00ak baino lehen atera behar dira, eta 12 euro ordaindu behar da zerbitzua. Ordainketa aldez aurretik egin behar da (izena-abizenak jarrita: 2101 0041 00 0004013991).
Pila erabiliak utzi behar dira, pilak saltzen dituzten dendetan.