Luis Llopis hernanirra atezainen entrenatzaile da, eta liburu berria aurkeztu zuen, ostegunean Lezaman. Implicación y relación del portero en el juego colectivo izenburupean, liburuak aztertzen du atezainek, futbolak jasan duen eboluzioaren ondorioz, bere jokatzeko moduan izan dituzten aldaketak, eta horiek entrenatzeko metodologia.
Metodologia oso bat
garatzen duen liburua
Real Union, Real Sociedad eta Real Madriletik igaro ostean, aurtengoa bigarren denboraldia du Llopisek Athleticeko atezainen entrenatzaile moduan. Lan horren isla da liburu hau, eta Iraizoz eta Armando Athleticeko atezainen lanaz gain, liburuan aztertzen da Valdes, Palop eta Diego Lopez atezain ezagunek Athleticen aurkako partiduetan egindako lana. Horretan oinarrituta metodologia oso bat garatzen du atezain modernoaren entrenamendurako.
Llopisen ustez, atezainak ez du mugatzen bere jarduna geldiketak egitera. Futbolaren eboluzioak behartu du taldearen joko kolektiboan inplikatzera eta honetan gero eta garrantzia haundiagoa hartzen du atezainak.
Hau ez da futboleko entrenamendu metodoen ohiko liburu bat. Partidu batean atezain batek izan ditzakeen egoera desberdinak islatzen ditu eta horien aurrean hobeto prestatuta egoteko herramintak ematen dizkio. Horrela, aurrez aipatutako atezainek, Athleticekin jokatu dituzten partiduetan, edo talde txuri- gorriaren aurka izandako partiduetan sortutako gertaerak aztertzen dira. Egoera horien aurrean zer sentsazio, bizipen edo erabaki hartu dituzten, eta hauek okerrak edo egokiak izan diren aztertu ondoren, horien aurrean atezaina nola prestatu zehazten da. Hortik aterako da gaur eguneko futboleko atezaina entrenatzeko metodologia egokia.
Oihartzun haundia
futbolaren munduan
Liburu honek oihartzun zabala izan du futbolaren munduan. Hitzaurrea Joaquin Caparros eta Juan Carlos Mandia entrenatzaileek egin dute; lehenengoa talde bizkaitarreko entrenadorea da, eta bigarrena, R. Madrileko harrobiko entrenatzailea denbora askoan izateaz gain, Racing eta Castellon taldeak zuzendu ditu lehenengo eta bigarren mailan.
Gainera, orain dela aste batzuk Madrilen egindako aurkezpenean, estatuko futboleko ordezkari garrantzitsuenak izan ziren. Lehen mailako talde gehienek ordezkariak bidali zituzten. Bereziki, kirol zuzendarien eta atezainen entrenatzaileen presentzia izan zen nabarmena. Athleticeko lehen plantillako hainbat jokalarik ere bere babesa agertu zioten LLopisi Madrileko aurkezpen horretan.
Luis Llopisek izen haundia hartu du estatu mailako futbolean, baina baita ere nazioarteko mailan. Ekainean Veronan egingo den futboleko kongresuan ponente bezala ariko da. Kongresu horretan atezainen inguruan mintzatuko dira eta Llopis izango da protagonista garrantzitsuenetakoa. Gainera EHUk antolatzen dituen udarako kurtsoetan ere egongo da, Zubietan.