udala pozik dago Atez Atekoak lehenengo astean lortutako emaitzekin. Bikainak direla dio datuei erreferentzia eginda: «igande gauean 3.500 kilo organiko jaso ziren eta asteazkenean, hau da, bigarren bilketa egunean, 11.100 kilo. Astelehenean, berriz, 2.800 kilo ontzi arin jaso ziren eta asteartean, 3.540 kilo paper/kartoi. Izan duen arrakasta argi uzteko, honako konparazioa egiten du: «Hernanik egun bakarrean jaso du, Zarautzek hilabetean jasotzen duena (11.023 kilo) baino gehiago eta Aretxabaletak hilabetean jasotzen duenaren (5.875 kilo) bikoitza».
«Irtenbidea hondakinen arazoari»
Izaskun Txintxurreta ingurumen zinegotziaren arabera, «irtenbidea aurkitu diogu hondakinen arazoari. Herritarrak lehenengo egunetik hasi dira hondakinak behar bezala ateratzen. Pozik gaude eta eskerrak eman nahi dizkiogu jende guztiari, oso ondo egiten ari direlako». Eta gaineratu du: «Bi egunetan ia 15 tona organiko jaso ditugu. Duela astebete tona horiek guztiek zabortegian amaituko zuten; orain konpostatu egingo ditugu. Hernani birziklapenarekin konprometitu da eta 20.000 laguneko talde batek elkarlanean asko lortu dezake. Emaitza hauek aurkezten jarraitzen badugu, Diputazioak Usurbilgo Itunak eskatzen dion moratoria eman beharko du».