Hasi da Atez Atekoa. Atzo organikoa bildu zen, eta gaur ontzi arinak atera behar ditu herritarrak. Ontzi arinak (plastikoa), lehen kontainer horira botatzen zirenak. Kontainer guztiak kendu ditu Udalak (beirarena izan ezik), eta zintzilikatzeko posteetan utzi behar dira hondakinak, hemendik aurrera. Atzo, arratsaldeko 20:00etan hasi zen jendea kubo marroiak ateratzen, eta 23:00etan biltzaileek lan dezentu zuten pilatua. Bestalde, goizean, lehen kontainerrak zeuden puntuetan zaborrak pilatuta azaldu ziren, eta langileak aritu ziren garbitzen.
Atez Atekoari ongietorria
Bestalde, Tilosetan herritar asko bildu zen atzo Atez Atekoari ongietorria egitera. Festa horretan, Marian Beitialarrangoitia Alkateak hernaniarrak zoriondu zituen, hartutako bideagatik, eta egindako apustuagatik, eta «laster denak oso harro» egongo garela adierazi zuen.
Adierazi zuen, Hernani pauso hau emateko gai izan delako, zenbait zinegotzi eta agintari urduritu egin dela, baina atzera biderik ez duela apustu honek.