«Datorren urterako ez dugu gogo faltarik» adierazi dio Kronikari Eneko entrenatzaileak. Teklan Hernanik larunbatean zuen denboraldiko azken partidua. 47-66 galdu zuen Alde Zaharra taldearen kontra, eta mailaz jaitsi dira, erregionalen lehenengo mailatik, bigarrenera. Zorteak ez dio askorik lagundu hernaniarrei, eta ondo hasitako denboraldia erabat itsusitu zaie bukaerarako, lesio dezente medio.
«Behin galtzen hasita, zaila izaten da bolada txarrari buelta ematea, eta hori da, bukaera aldera pasa zaiguna», adierazi dio Eneko entrenatzaileak Kronikari.
Taldea gogotsu, eta datorren urtean ekipo bat gehiago
Entrenatzaileak, dena dela, taldeak azaldutako jarrera ona azpimarratu du, eta datorren urterako gogotsu daudela, denboraldi on bat egiteko. «Taldea gogotsu dago. Datorren urtean seniorretako taldean ia denak hernaniarrak izango gara (orain 8 dira). Juniorretan talde bat izango dugu, eta kadeteetan bi, aurten baino bat gehiago».